Moskva şeer mahkemesi Moskva SİZOsında 70 kün devamında açlıq tutqan ukrain uçucısı Nadejda Savçenkonı apiste qaldırdı.
Bunı onıñ adliyecisi Nikolay Polozov Twitter saifesinde bildirdi.
Onıñ diger adliyecisi Mark Feyginniñ bildirgenine köre, mahkemeniñ Savçenkonıñ cezasını deñiştirmek «ya da oña ölmege imkân bermek» içün «soñki fursatı qaldı». Ukrain uçucısı mahkemede video bağı vastasınen iştirak etti.
Мосгорсуд оставил Савченко под стражей. #FreeSavchenko
— Николай Полозов (@Moscow_advokat) 25 Лютий 2015
Nadejda Savçenko dekabr ayında açlıqqa başlap, oña devam ete.
Fevral 19-da uçucınıñ imayesi bildirdi ki, o, glükozadan bile vazgeçti. Savçenkonıñ adliyecileri onıñ alı fenalaşqanını aytalar. Rusiyede Nadejda Savçenkonı Donbassta elâk olğan Rusiye jurnalistleriniñ ölümine alâqası olğanında qabaatlaylar.
İyünniñ soñunda separatistler onı esir alıp, Rusiye arbiylerine teslim ettiler. Bundan soñra Savçenkonı Rusiyede apiske aldılar. İmayeniñ malümatına köre, onıñ jurnalistlerniñ ölümine alâqası yoq, çünki o, esarette edi. Savçenko bütün qabaatlarnı red ete.
Yanvar ayınıñ soñunda taqiqatçılar Savçenkoğa qarşı sıñırdan qanunsız keçüv aqqında daa bir cinaiy iş açılğanını bildirdiler.