Kiyevde Rusiye tarafından Qırım işğali yıllığına bağışlanğan konferentsiyağa azırlıq köreler.
Bunı Ukraina prezidentiniñ qırımatatar halqınıñ işlerinden vekâletlisiniñ matbuat hızmeti bildire.
Konferentsiya eki munaqaşa şeklinde keçecek: «Qırım işğali. 2014 dersleri» ve «Qırımnıñ qaytarıluvı: Tahminler. Qararlar».
Tedbirge Ukraina milliy havfsızlıq ve mudafaa şurasınıñ kâtibi Оleksandr Turçinov, Ukraina prezidenti Memuriyetiniñ baş muavini Valeriy Çalıy, Ukraina prezidentiniñ qırımatatar halqınıñ işlerinden vekâletlisi Mustafa Cemilev, Qırımtatar Milliy Meclis reisi Refat Çubarov, Aqmescit ve Qırım arhiyepiskopı Vladıka Kliment, qırım, ukrain jurnalistleri ve cemaatçıları davetli.
Konferentsiyanı fevral 26 künü saat 13:30-17:00 arasında «Ukrain buhraniy media-merkezinde» keçirmege planlaştıralar. Canlı yayında tedbirni «5 kanal» ve «Çernomorskaya teleradiokompaniya»sı, YouTube agında «Ukrain buhraniy media-merkezi» kösterecek.
Mart 17-ne qadar Kiyevde Qırım işğali yıllığına bağışlanğan tedbirlerniñ keçirilmesi planlaştırıla. İnformatsion kapmaniyasınıñ teşkil etilmesine uquq qoruyıcı ve cemaat teşkilâtları, ekspert merkezleri, ukraina devlet organlarınıñ ve halqara birlikleriniñ vekilleri qoşuldı. Teşebbüsçileriniñ aytqanı kibi, maqsatları – ukrain akimiyeti ve cemiyetine Qırım faciasını hatırlatmaq ve er kesni Ukrainanıñ işğal etilgen toprağınıñ qaytarılmasına qoşulmağa celp etmektir.