Bazarertesi künü, fevral 23-de, Kiyevde «Noman Çelebicihan – kelecek nesiller içün keçmişniñ dersleri» mevzusında muzakereler keçirilecek.
Bunı Ukraina prezidentiniñ qırımtatar halqınıñ işlerinden vekâletlisi Mustafa Cemilevniñ matbuat hızmeti bildire.
Tedbir saat 18:00 (Kiyev vaqtına köre) İlinskaya, 9 adresi boyunca yerleşken Yelena Zamostân adına Sanat galereyasında ötkerilecek.
Hatıra tedbiri Qırımtatar Milliy Meclisi ve «Kiyev-Mogilân akademiyası» Milliy universiteti tarafından Ukraina prezidentiniñ qırımtatar halqınıñ işlerinden vekâletlisiniñ yardımı ile teşkil etildi.
Noman Çelebicihan 1885 senesi molla qorantasında doğa. Bağçasaray, İstanbul, Sankt-Peterburgda oquy, qırımtatar yaşlarınıñ maarif ve inqilâbiy teşkilâtlarında iştirak ete. 20-nci asırnıñ başında eñ istidatlı qırımtatar edebiyatçısı olaraq tanıla. Qırımtatarlarnıñ milliy gimniniñ müellifi ola. 1917 senesi Fevral inqilâbından soñ Musulman icraiy komitetiniñ reisi, Qırım müfisi – soñra ise Birinci Qırımtatar Milliy Qurultayınıñ reisi ola. 1918 senesi yanvar ayında bolşevikler tarafından yaqalana, fevral 23 künü apiste deñizciler tarafından öldürile. 33 yaşında olğan müftiniñ cesedi deñizge atıla.