Qırım prokuraturası teşkerüvni keçirdi ve neticede «narazılıq meydanlarında» olğan 3,5 biñden ziyade qanunsız qurulışnı sayıp çıqtı.
Bunı nezaret müessiseniñ matbuat hızmeti bildire.
Beyanatta aytılğanı kibi, teşkerüvler neticesinde qararlar alınacaq.
Prokuratura Aluşta, Yalta, Sudaq, Kezlev, Aqmescit ve Aqmescit rayonında teşkerüvlerni keçirdi ve er bir obyekt boyunca malümatnı toplağan tam cedvelni tizdi.
«Cedvelge 3,5 biñ obyekt kire, üçte biri kapital inşaattır. 1,5 biñ ga meydanlığında yerleşe, şu cümleden tarihiy-medeniy, köy hocalığı, yalı topraqlarında qurulğanlar», – denile beyanatta.
Müessiseniñ malümatına köre, cedveller Qırım nazirler Şurasına berildi.
Evel bildirilgeni kibi, Qırım mahkemeleri topraq «samozahvatlarında» qanunsız sürette qurulğan inşaatlarnıñ yoq etilmesi aqqında 150-ge yaqın qarar çıqardı.
Yañı yılnıñ başında Qırımnıñ öz başına ilân etilgen akimiyeti yarımadada «samozahvatlarnıñ» meselesi bütünley çezilecegi aqqında bildirgen edi.
Qırımtatar Milliy Meclis reisi Refat Çubarov Qırım akimiyetiniñ işbu niyeti yarımadada işğalden soñ peyda olğan rusiyelilerniñ maddesi ve istegi ile bağlı olğanını tüşüne.