İşğal etilgen Qırımnıñ Devlet Şurası çarşenbe künü «Ukrtelekom» Qırım filialınıñ «milliyleştirüvine» qol tuttı, haber ete Qırım.Aqiqat mühbiri.
İşbu qarar Qırımnıñ öz başına tayin etilgen baş naziri Sergey Aksönovnıñ teşebbüsidir.
«Şirketniñ 370 biñ qullanıcısı bar edi, Qırımda internet-hızmetleriniñ 40% temin ete edi. Em de işbu sene devamında, Qırımnıñ Rusiyege qoşuluvından soñ, Ukraina qanuniyetine köre çalışa edi, Rusiye qanunlarına köre qayd etilmedi, litsenziyanı elde etmedi, aylıqnı grivna kursına köre bere edi, bu ise şirket hadimleriniñ işini imkânsız ete», – dedi Aksönov sessiyada.
O şunı da qayd etti ki, mütehassıslar Qırım filialında «zararlı programmanı» tapqanlar, fevral 11 künü işletilecek edi eken.
«O fevral 11 künü malümat bazasını söndürmek ve Qırımnı bağsız qaldırmaq kerek edi», – dey Aksönov.
Filialnı «milliyleştirmek» teklifi elçırpmalar ile alğışlanıldı.
Fevral 10 künü Qırımda «Ukrtelekom» ukrain operatorınıñ bağı yoq odı. Qırım akimiyeti buña alâqası olmağanını bildirdi.
Yarımadada «Ukrtelekom»nıñ eki bölügi çalışa edi: biri Aqyarda, digeri – Aqmescitte. «Ukrtelekom»nıñ Qırım bölügi Qırım qullanıcılarınıñ 80% hızmet ete edi. Şirketniñ saibi – Rinat Ahmetov.