Terrorizmge qarşı tedbirler keçirilgen yerler ve işğal etilgen Qırım ile demiryol ve maşina alâqaları Ukraina vatandaşlarınıñ telükesizligi içün toqtatılğan edi ve Ukraina milliy havfsızlıq ve mudafaa şurasınıñ (RNBO) qararı ile ğayrıdan tiklenecek.
Bunı Ukraina infrastruktura naziri Andrey Pivovarskiy cuma künü, fevral 6-da, matbuat konferentsiyasında bildirdi.
«Bu Ukraina vatandaşlarınıñ havfsızlığı meselesidir. RNBO bunıñnen bağlı bir qarar qabul etse, İnfrastruktura nazirligi de aynısını yapacaq», – dep qayd etti nazir.
Andrey Pivovarskiyniñ aytqanına köre, işğal etilgen Qırım ile alâqalar qararı da aynı bu şekilde qabul etilecek.
«Şimdilik böyle bir avale yoq», – dep qayd etti nazir.
Malüm ki, 2014 senesi dekabr 26-dan itibaren Ukraina Qırım ile avtobus alâqalarını toqtattı. 2015 senesi yanvar 6-dan itibaren terrorizmge qarşı tedbirler keçirilgen yerler ile naqliyat alâqaları toqtatıldı.