İşğal etilgen Qırımda fevral ayından itibaren «Mesken mustaqil inşaat qurucılığına topraq damartılarınıñ berilmesi içün vatandaşlarnıñ cedveli» programmasını açmağa vade eteler. Bunı Qırım «Nazirler şurasınıñ» reis muavini Ruslan Balbek bildirdi, – dep haber ete Qırım ükümetiniñ matbuat hızmeti Facebook saifesinde.
Onıñ aytqanına köre, böyle bir cedvel azırlamağanda bunı esasen aracılar yapqan ediler.
«Qanunğa köre böyle bir munasebetler ve olarnıñ imaye altında olmaması «narazılıq meydanlarınıñ» reberlerine birisini cedvelge almağa, başqasını ise almamağa imkân bergen edi. Epimiz bu topraq damartıları nasıl etip ğayrıdan satılğanını bilemiz», – dep qayd etti Ruslan Balbek.
Balbekniñ bildirgenine köre, topraq damartılarını alacaq vatandaşlarnıñ cedvelini tizgen «Krımsvâz» devlet müessisesiniñ hadimleri Qırım ükümetiniñ talaplarına boysunıp, vatandaşlarnıñ şahsiy malümatlarını saqlamağa, ve ariza bergen soñ malümatnı deñiştirmege ya da qoşmağa imkân qaldırmamağa tırıştılar.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.