Yanvar 26 künü ATR qırımtatar telekanalına tintüv ile kelgen silâlı insanlar videoarhiv serverini tutıp aldılar. Al-azırda telekanal signalı sögdürildi.
Bunı Qırım.Aqiqat saytına ATR qırımtatar telekanalınıñ haber siyaseti boyunca baş müdiriniñ muavini Lilâ Bucurova bildirdi.
«Serverge irişip olamaymız. Bizden onı tutıp alğanlar, dep ayta bilem. Serverde videoarhivimiz saqlıdır», – dedi o.
Bucurova telekanalda tintüv sabağace süre bilecegini tüşüne.
«Menimce, tintüv uzun zamanğa sürecek, bizge aqşam evleriñizge qaytmağa ümüt etmeñiz, aytqanlar. Belki sabağace, dep ima ettiler, çünki oda, insan çoqtır. Kimseni çıqarmay ve kirsetmeyler», – dedi Bucurova.
Al-azırda telekanalnıñ yayınlarını onıñ saytında ya da sputnik ağından seyir etmek mümkün.
Bazarertesi künü, yanvar 26-da, ATR qırımtatar telekanalına silâlı insanlar sürip kirdi. Haberlerniñ acele yayınında alıp barıcı silâlı insanlar Aqmescitte yerleşken ATR qırımtatar telekanalına bir yıl devamında olıp keçken adiselerniñ video malümatını, şu cümleden, fevral 26 künü Qırım parlamenti divarları yanında keçirilgen mitingniñ videosını saqlağan bilgisayar serverini tutıp almaq içün kelgenini bildirdi.
Hatırlatamız, 2014 senesi fevral 26 künü Qırım parlamenti divarları yanında Qırımnıñ ayırıluvına qol tutqanlar ve Ukraina birdemligi tarafdarları arasında muqavemet-mitingi keçirilgen edi. Ekinci tarafnıñ esas qısmı qırımtatarları edi.
ATR qırımtatar telekanalınıñ haber siyaseti boyunca baş müdiriniñ muavini Lilâ Bucurova canlı yayınğa çıqıp, halqqa muracaatta bulundı. O, silâlı insanlarğa bazarertesi künü telekanalda tintüvni keçirmege izin bergen yerli akimiyet areketlerini takbih etti.
Vaqia yüz bergen yerge Qırımtatar Milliy Meclis reisiniñ muavini Ahtem Çiygoz da keldi. O, işbu vaqianı qırımtatarlarnı qorqutmaq içün bir usul olaraq adladı.