Ukraina prezidenti Petro Poroşenko «Terroristler tarafından Mariupol şeeriniñ mesken yerlerine ateş açılğanı neticesinde vefat etken yerli sakinlerniñ hatırasına» yanvar 25 kününi – Matem künü olaraq ilân etti. Devlet başı işbu fermannı bugün gece imzaladı, dep haber ete onıñ resmiy saytı.
«Elâk olğanlarnıñ hatırası saat 12:00 sükünet daqqası ile añılacaq. Ukraina territoriyasında yerleşken ev, devlet akimiyet organlarınıñ, yerli akimiyet organlarınıñ, şirket, müessise ve teşkilâtlarnıñ binalarında Ukraina devlet bayrağı tüşürilecek», – denile beyanatta.
Mariupolniñ şimaliy mesken maallerine ateş açılğanı neticesinde yanvar 24 künü 30 insan elâk oldı, 100-ge yaqın adam yaralandı. OSCE mahsus nezaret eyyeti qayd etkeni kibi, ateş «DHC» nezareti altında olğan taraflardan açılğan edi.