İşğal etilgen Aqmescitte cumaaqşamı künü, yanvar 22-de, belgisiz şahıslar Ukraina Birdemlik Künü munasebeti ile Taras Şevçenko abidesine demetlerni ketirdi, amma birazdan yerli vandallar olarnı darma-dağın etti.
Qırım.Aqiqat mühbiri bergen malümatqa köre, aqmescitliler, sabadan başlap, Şevçenko abidesine çeçeklerni ketire edi. Bazı demetler Ukraina devlet bayrağı tüsünde toplanğan edi, aynı şu güldesteler vandallar tarafından dağıtıldı.
Şaatlarnıñ sözlerine köre, abide ögünde yanvar 22 künü mavı susam ve sarı küz çeçeginden toplanğan güzel demetler bar edi. Amma aqaşam, saat beşlerge, demetlerden bir şey qalmadı, belgisiz şahıslar güldestelerden sarı küz çeçeklerini çıqarıp, meydan boyunca dağıttılar, – haber ete Qırım.Aqiqat mühbiri.
Böyle bir vaqia bundan evel endi yüz bergen edi. Qırım.Aqiqatnıñ haber etkeni kibi,İşğal etilgen Aqmescitte Yevromaydan yıllığında, noyabr 21-de, İtibar ve Azatlıq Kününde, qırımlılar Taras Şevçenko abidesine çeçeklerni ketirdiler, amma soñra belgisiz vandallar güldestelerni dağıtıp aldılar.
Aytqanlarına binayen, Ukraina tuğrası şeklinde ve bayrağı tüsünde yapılğan qanser gülçemberi ayırı diqqatnı celp ete edi, birazdan bu güldeste de vandallarnıñ tarafından dağıtıldı.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.