İşğal etilgen Qırımda özen, deñiz ve göl yalısında naqliyat ile yürüv içün insanlarğa cöreme belgileyler. Yanvar 16 künü «Sobıtiya Krıma» neşiri haber etkeni kibi, deñiz yalısından 500 metr, göl yalısından – 50 metr ve özen yalısından – 200 metr «yasaq etilgen zona» sayıla.
Qırımlılarnıñ aytqanı kibi, para cezası, işbu yasaq etilgen zona aqqında işaret olğanına-olmağanına baqmadan, belgilene.
Neşirniñ malümatına köre, Rusiye Suv kodeksiniñ 65-nci maddesine binayen, suv qoruv zonasında naqliyat vastalarınıñ turağı ve yürüvi yasaq etile.
İşbu qaideniñ bozuluvı içün para cezası 3-4,5 biñ rubleni teşkil ete. Para cezası balıq inspektsiyası ve tabiat qoruv prokuratura tarafından belgilenecek.
«Taqım, bir-eki inspektor ve eki şaat kelip, resmiyleştire. Demek, yalığa ya da balıq avına barmaq içün suv yanındaki topraqta turmağa ve yürmege yasaq, para cezasını ala bilesiñ. Cezalar boyunca plannı toldurmağa kerek olğanda, inspektorlar «avğa» çıqa ve yol boyu birinci rastkelgen insannı cezalaylar. Yazda ise bu alğa er bir avto, moto ve ayaqmaşina sevdası qala bile, çünki Suv kodeksinde farqlı naqliyat vastalarınıñ turağı ve areketi yasaqlana», – deyler şaatlar.
Neşirniñ malümatına köre, böyle cezalarnıñ belgilenmesi endi Kezlevde yüz bergen edi.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.