Qırımtatar milliy areketiniñ temsilcileri (NDKT) «Qırım Cumhuriyetinde tasil aqqında» qanun leyhasınıñ baqılması ve qabul etilmesine qarşı çıqtılar, dep haber ete QHA.
NDKT işlerini idare etken Kemal Mambetov bildirdi ki, işbu qanun leyhası Qırımda tillerniñ musaviy uquqlı olmasını boza.
«Tasil tili» maddesinde aytıla ki, dersler rusça berile, ukrainca ve qırımtatarca tasil almasını talap etmek ise ana-babalarnıñ aqqıdır, lâkin bu tiller devlet tilleri olsa, olarnıñ da aynı aqqı olmalı», – dep ayttı Mambetov.
Bundan sebep areket azaları Qırım «Devlet şurasınıñ» tasil, ilim, gençlik siyaseti ve sport komissiyasınıñ reisi Vladimir Bobkovğa muracaat etmege qarar aldılar. O, olarnıñ arizalarına yazma şekilde cevap berecegini bildirdi.
Qırımda işğalden soñ qabul etilgen «Anayasağa» binaen, yarımadada üç devlet tili bar – rus, ukrain, qırımtatar.
Lâkin Rusiye işğalinden soñ Qırımnıñ aman-aman bütün mekteplerinde devlet tilleri aynı seviyede ögrenilmey. Rus tiline aftada 5-6 saat ayırılsa, qırımtatar ve ukrain tillerini fakultativ olaraq ögreneler ya da aslı ögrenmeyler.