Qırımda yanvar 23 künü temsiliy akimiyet iştiragi ile tögerek masa keçirilecek, mında Qırımda Rusiye Taqiqat komitetiniñ Baş «taqiqat idaresi» yolbaşçısınıñ qırımtatarlarnıñ ölümi ve ğayıp oluvı boyunca esabatı diñlenilecek, dep haber etti Qırım «ombudsmeni» Lüdmila Lubina, dep bildire Krım Media.
«İnsanlarnıñ ğayıp oluvı ile bağlı mesele – cumhuriyet başı Sergey Aksönovnıñ nezareti altındadır. Komissiya ekide bir toplanıp, öz areketi aqqında esabat bere. Taqiqat devam ete. Yanvar 23 künü akimiyetniñ bütün pıtaqları ile tögerek masa keçirilecek. Biz toplaşuvğa Taqiqat komitetiniñ idare reberini de davet etermiz», – dey Lubina.
Qırımda qırımtatarlarnıñ ğayıp oluvı boyunca beş cinaiy iş açılğan edi.
2014 senesi dekabr 5-de Qırımda İnsan aqlarınıñ Kontakt taqımınıñ Qırımnıñ öz başına tayin etilgen baş naziri Sergey Aksönov ile körüşüvi keçti. Bunıñ ile «taqiqat komiteti» Qırımda 2014 senesi mart-oktâbr ayları devamında insanlarnıñ ğayıp oluvı boyunca taqiqatı aqqında bir şey bildirmedi.
Şu cumlden, söz Leonid Korj, Timur Şaymardanov, Seyran Zinidinov, İslâm Cepparov, Cevdet İslâmov ve Eskender Apselâmovnıñ ğayıp oluvı aqqında kete.