Keriç keçitinden Qırımğa yol alğan yolcularğa «Titanik» belli facia-filminden alınğan muzıkanı qoyıp, ozğaralar, dep haber ete kerch.com.ru.
Neşirniñ malümatına köre, «Olimpiada» paromınıñ yolcuları «Kavkaz» limanında yerli vaqıt boyunca saat 17-de paromğa minip, Keriçke yol aldılar. Ava şaraitleri de uyğun edi – sıfırdan aşağı on derece.
Şaatlarnıñ aytqanı kibi, paromnı Qırım tarafına yolladılar ve apansızdan ses yañğıratqıçtan yolcularnı qorqutqan «Titanik» muzıkası yanğıradı.
«İnsanlarnıñ çoqusı yırğa birden seslendiler – yolcular gemi burnuna çapıp, ne olayatqanını bilmege tırıştılar. Olar qaranlıqqa baqıp, ne içün olarğa aynı bu yırnı qoyğanlarını añlamağa areket ete ediler», – dep añlattı şaat.
Yır şaqa olaraq yanğıradı, amma yolcular oña qyımet kesmediler, dep yaza neşir.
Aqşamğa, yanvar 8-de, Keriç boğazı rayonında yel küçü 14-16 m/s yetti, üç parom qatnay edi.