Pariste Eyfel qullesiniñ yarığı Charlie Hebdo satirik mecmuasınıñ muarriyetine olğan ücüm neticesinde vefat etkenlerniñ hatırasına söngen edi. Bunı Fran Press bildire.
Cumaaqşamı künü, saaat 20, yarıqnı söndürdi, soñra ise kene berdiler.
İllüminatsiyanı ilk sefer söndürdiler, çünki qulle er kün qaranlıqnıñ tüşmesi ile yarıq saçmağa başlay edi. Yarıqnıñ söndürilmesi – Charlie Hebdo mecmuasınıñ ve politsiya hadimleriniñ öldürüvi sebebinden keçirilecek matem tedbirlerniñ bir qısmıdır. Cumhuriyet meydanında eki gece devamında çıraqlar ile terakt qurbanlarını aña ediler.
Frenkistan medeniyet ve alâqa naziri Flör Pelren jurnalğa million yevro ayırmaq niyeti aqqında bildirgen edi. Charlie Hebdo muarririyeti «Liberasyon» gazetasınıñ ştab-dairesinde yerleşecek, maliye destegi ise «Mond» neşriyat evi ve «Kanada plüs» gruppası tarafından berilecek. Bunı Frans Presske neşirniñ adliyecisi Rişar Malka bildirdi.
Matbuat vastalarınıñ malümatına köre, teraktan soñ Charlie Hebdo öz faaliyetine devam etermi degen sual peyda oldı, çünki onıñ eñ eyi hadimleri elâk oldı – Stefan Şarbonye (Şarb), Jan Kabü ve Jorj Volinski. Soñkileri siyasiy karikaturanıñ yıldızları edi, öz icadiy yolunı daa 1960 seneleriniñ başında başladılar.
Frans Press haber etkeni kibi, kelecek afta Charlie Hebdonıñ million nushası çıqacaq.