Frenkistannıñ Charlie Hebdo muarririyetine yapılğan ücümda şeklengen üç şahıstan biri 18 yaşında Hamid Murad politsiyağa özü teslim etildi. Bunı France-Presse bildire.
Agentlikniñ malümatına köre, Murad Reims civarındaki şeerlerden birinde apiske alındı. Onı ağa-qardaş Şerif ve Said Kuaçiniñ ortağı dep adlaylar. Kuaçiler yanvar 7-de kündüz satirik mecmuanıñ muarririyet binasına kirip, avtomatlardan ateş açtılar. Ücüm neticesinde 12 insan elâk oldı.
Cumaaqşamı künü, yanvar 8-de, Frenkistan politsiyası ağa-qardaş Kuaçilerniñ fotoresimlerini aydınlattı. Politsiya beyanatında denile ki, 32 yaşında Şerif ve 34 yaşında Said apiske alınmalı. Olarnıñ yanında silâ bar ola bile.