Aleksey Navalnıy Manejnaya meydanına barıp çıqmadı, onı yaqaladılar – bunı Rusiye muhalifi öz twitter saifesinde bildirdi.
«Manejnaya meydanına qadar barıp yetmedim. Amma siz bunı becere bilirsiñiz. Sizlerni qaytmamaq çağıram. Er kesni yaqalap olamazlar», – dey Navalnıy.
İçtimaiy ağlarda politsiya Navalnıynı yaqalağan vaqıtta çıqarılğan fotosüretler peyda ola.
«Navalnıy Ritts Karlton yanında yaqalandı»,– dep yazdı tevqifni çıqarğan Anton Belitskiy.
Aynı zamanda, Aleksey Navalnıy öz twitter saifesinden Rusiye sakinlerine numayışnı qaldırmamağa çağıra.
«15 daqiqa olsa da, millionlarnen insannı toplağan bir şahıs olmağa pek memnün edim. Meni yaqalasar da, müim degil. Siz yapa bilecegiñizni men yapıp olamam», – dep yazdı Navalnıy.
Я был рад хоть пятнадцать минут быть той единицей без которой не соберутся миллионы.
— Alexey Navalny (@navalny) 30 декабря 2014
Bu vaqıtta Manejnaya meydanında tevqif devam ete edi. meduza neşiri bergen malümatqa köre, tahminen 40 insannı tutıp yaqaladılar, politsiya küçüni qullana edi.
«OMON yuvurdı, Tverskaya soqağında ve Manejnaya meydanında çoq insan yaqalandı. Er kesni yaqalaylar, qattı sürette»,– dep bildire şaatnıñ sözlerini neşir.
Evel bildirilgeni kibi, Rusiye Federatsiyasınıñ paytahtı Manejnaya meydanında narazılıq numayışı keçirile.
Ev tevqifine baqmadan, Rusiye muhalifi Aleksey Navalnıy da numayışqa qoşulacaq edi.