Çarşenbe künü, dekabr 24-de, işğal etilgen Qırım kene de ışıqsız qaldı.
Qırım.Aqiqat mühbiri bergen malümatqa köre, Aqmescit bütünley elektroteminlevsiz qaldı, Canköy ve diger şeerlerden de bu kibi haberler kele.
Onıñ malümatına köre, Qırım qarma-qarışıqlıqqa bata, hususan bunı sfetoforlar çalışmağan yarımadanıñ yollarında körmek mümkün.
«Svetoforlar çalışmay, yol areketini idare etkenler öz vazifeni becerep olamaylar, Aqmescit soqaqlarında müthiş tıqanıqlıqlar, atta qazalar yüz bere»,– dey Qırım.Aqiqat mühbiri.
«Krımenergoda» vaziyetni ögrenmek imkânsız, kol-merkeziniñ telefonlarına kimse cevap bermey.
Dekabr 23 künü «Krımenergo» şirketi kene de qazaiy söndürüv cedvelini işletti.
Aynı vaqıtta, Qırımnıñ öz başına tayin etilgen baş naziri Sergey Aksönov Rusiye ve Ukraina arasında Qırım yarımadasına eletroenergiyanıñ berilüvi aqqında añlaşmanıñ qabul etilgenini bildirdi.