Kiyev şeer şurası qullanılmağan bina ve inşaatlarnı işğal etilgen Qırım ve terrorizmge qarşı tedbirler keçirilgen yerlerden mecburen köçip kelgen insanlarğa bermege izin berdi. Salı künü, dekabr 9-da, UNİAN bergen malümatına köre, buña Kiyev şurasınıñ toplaşuvında bulunğan 62 deputat qoltuttı.
Leyha köçip kelgenlerge mesken bermek maqsadında azırlandı.
Qabul etilgen qararğa binaen, boş bina ve inşaatlarnı Devlet sanitar epidemik hızmeti belgileycek.
Mesken-kommunal hızmetleriniñ fiyatı adiy binalardaki fiyatlarğa teñ kelecek.
Ukrainada işğal etilgen Qırım ve terrorizmge qarşı tedbirler keçirilgen yerlerden 526 biñ insan köçip keldi. Bunı dekabr 7-de RNBO spikeri Andriy Lısenko bildirdi.