Arslan Saidov, Dinara Setdikova
Groznıy merkezinde Rusiye arbiyleriniñ silâlı şahıslarğa qarşı mahsus ameliyatı devam etmekte. Ziddiyet gece Yol-patrul hızmetiniñ noqtasında vesiqalarnıñ teşkerüvi vaqtında başlandı. Soñki malümatqa köre, bir qaç insan Çeçenistan paytahtı mektepleriniñ birinde qapalıdır. Esirler aqqında malümat yoqtır.
Evel üç politsiya hadimini öldürgen silâlı insanlar taqımı cumhuriyet gazetaları, internet-neşirleri ve fedearl matbuat vastalarınıñ temsilcilikleri yerleşken Matbuat evini zapt etti. Politsiya hadimleri ile yüz bergen çatışma neticesinde yedi insan elâk oldı. Bunı, Rusiye matbuat vastalarınıñ haber etkenlerine köre, ameliyatnı şahsen idare etken Çeçenistan başı Ramzan Kadırov bildirdi. Matbuat evi harap etildi. Şaatlar vaqia yerinden videolarnı aşkâr eteler.
Şimdi mektepte bulunğan silâlı insanlarnıñ sayısı belli degil. Haber etilgeni kibi, soñkileri üç maşina vastası ile areket ete ediler. Zarar körgenlerniñ aqqında da tam bir malümat yoqtır. Rusiye Sağlıq saqlav nazirligine esaslanıp, TASS «tünevin gece Groznıy şeerinde başlanğan boyeviklerni zararsız alğa ketirilmesi ile bağlı mahsus ameliyat neticesinde 21 insan yaralandı, dörtü elâk oldı». Çeçenistan akimiyeti aytqanı kibi, sakinler arasında iç kimse zarar körmedi. «İnterfaks» agentligi, öz qaynaqlarına tayanıp, nevbetteki raqamlarnı bere: 10 ölgen insan, 20 – yaralanğan.
Azatlıq Radiosınıñ mühbiri Marina İsayeva aytqanı kibi, olayatqan adiseler aqqında malümat az olğanı sebebinden boyeviklerniñ sayısı boyunca nice öşekler peyda olmaqta. Ramzan Kadırov silâlı taqımda 8-9 insan olğanını bildire.
Marina İsayeva
«Serbest mobil taqım»nıñ uquq qoruyıcısı Sergey Babinets Azatlıq Radiosına Groznıy şeerinde olayatqan adiseler aqqında tarif etti. Soqaqqa çıqmamağa tevsiye etile, çıqqanlarnı evlerge qaytmağa çağıralar, tükân ve mektepler çalışmay, şeerden ve şeerge kiriş-çıqışlarnñ qapalı olması da mümkünndir.
Sergey Babinets