İşğal etilgen Aqmescit akimiyeti Qırımtatar Milliy Meclisiniñ dekabr 10-da Lenin meydanında İnsan aqları halqara künü munasebetinen keçirecek olğan miting muracaatını qabul etmege istemey.
Bunı Qırımtatar Milliy Meclis reisiniñ muavini Ahtem Çiygoz dekabr 1-de Qırım.Aqiqatqa bildirdi.
«Biz üç künden berli miting keçirmek içün muracaatnı berip olamayıq. Onı farqlı sebeplerden qabul etmeyler: kantselâriya çalışmay ve ilâhre», – dedi Çiygoz.
O, bazarertesi künü, dekabr 1-de, Aqmescitteki Lenin meydanında «Qırım» cemaat areketiniñ teşebbüsinen raat keçirilgen mitingni qayd etti. Miting Rusiye prezidenti Vladimir Putinge qoltutmaq maqsadında ötkerildi.
«Bugünki tedbir, digerleri kibi, bütün hızmetler tarafından desteklendi, imaye bar edi. Meclis ise medeniyet, anane, milliy meselelernen bağlı tedbirler keçirilmesi içün muracaat berse, ya red eteler, ya da merkezen uzaq bir yerge yollaylar», – dep açuvını bildirdi Çiygoz.
Malüm olğanı kibi, er yıl dekabr 10-da Aqmescitteki Lenin meydanında Qırımtatar Milliy Meclisiniñ teşebbüsinen İnsan aqları Halqara künü munasebeti ile miting keçirile edi.
Hatırlatamız, bu sene qırımtatarlarnıñ Qırımdan sürgünliginiñ 70 yıllığına bağışlanğan matem mitingi Aqmescitteki Aq-Meçet qasabasında olıp keçti. Cumhuriyeti akimiyeti mayıs 18-de meydanda bir de bir tedbirler keçirilmesini yasaq etken edi.
Bundan ğayrı, Qırımtatar Milliy Bayraq künü de Aqmescitniñ Borçoqraq qasabasında olıp keçti. Aqmescit akimiyeti farqlı sebeplerni seslendirip, Mecliske miting keçirilmesine izin bermedi.
Qırım.Aqiqat bergen malümatına köre, dekabr 1-de Aqmescitteki mitingde Qırımtatar Milliy Meclis reisiniñ muavini Ahtem Çiygozğa çıqışta bulunmağa imkân bermediler.
Ahtem Çiygoz semetdeşlerine qırımtatarca muracaat etmege tırıştı, lâkin oña keder ettiler.