Kiyevde noyabr 26-da saat 11.00 Ukraina Tışqı işler nazirliginiñ binası yanında faaller Qırım siyasiy mahbüsi Aleksandr Kolçenkonıñ doğğan künü munasebetinen aktsiya keçirecekler.
Bu aqqında malümat Facebooktaki mahsus saifede peyda oldı. Tedbir noyabr 26-da 25 yaşını tolduracaq qırımlı Kolçenkoğa qol tutmaq maqsadında teşkil etile.
«Noyabr 26-da faal, Qırım işğaline qarşı narazılıqlarnıñ iştirakçisi Saşa Kolçenkonıñ doğğan künüdir. Yazıq ki, Saşa onı keregi kibi qayd etip olamaz: yarım yıldan berli o, diger «qırımlı mahbüsler» ile Rusiyeniñ «Lefortovo» SİZOsında terrorizm areketlerinde sebepsiz qaabaatlanıp buluna. Bu künü onıñ dostları ve bu vaziyetni adaletsiz olaraq tanığan insanlar Kiyevde TİN binası yanında toplaşıp, Saşanı tebrikleycek ve memurlardan o da Kiyevde Doğğan künniñ qayd etilmesine qoşulması içün Ukraina neler yapqanını soraycaq», – aytıla beyanatta.
Teşkilâtçılarnıñ aytqanılarına köre, aktsiyada bir de bir teşkilât ya da firqa timsalleri olmaycaq.
Malüm olğanı kibi, noyabr 13-te içtimaiy ağlarda «Qırım siyasiy mahbüsi Aleksandr Kolçenkonı doğğan künü ile hayırla» aktsiyası başladı. Ukraina ve Rusiyeniñ cemaat faalleri Qırım işğaline qarşı ötkerilgen aktsiyalarnıñ iştirakçisi Aleksandr Kolçenkoğa hayırlav sözlerini yollamağa teklif ettiler.
Qırımda faşizmge qarşı küreşken içtimaiy faal Aleksandr Kolçenko 2014 senesi mayıs ayında Aqmescitte apske alınğan edi. Onı Moskvadaki «Lefortovo» SİZOsına yolladılar.
FSB taqiqatçıları onı, ve Qırımnıñ daa üç sakinini, şu cümleden ukrain rejissöri Oleg Sentsovnı, terroristik areketler, terakt azırlanması ve silânı qanunsız qullanuvda qabaatlaylar. Bu sene oktâbr ayında onıñ apiste tutuv müddeti 2015 senesi yanvar 16-na qadar arttırıldı.