Qırım «Devlet şurasınıñ» reis muavini, «Qırım» cemaat areketini meydanğa ketirmek teşebbüsçisi onı qırımtatar halqınıñ «milliy lideri» dep adlandırğan cumhuriyet yolbaşçısı Sergey Aksönovnıñ sözlerine sakin davrana. Bu aqqında o, noyabr 18-de matbuat konferentsiyasında ayttı, – dep haber ete Qırım.Aqiqat saytınıñ mühbiri.
«Halq lideri olmaq içün seni halq tanımaq kerek. Elbet de, eñ faal işni biz («Qırım» areketi – muarrir) alıp baramız. Qırım Cumhuriyetiniñ reberligi daa yahşı bile. Olar bizlernen bağ tutalar, yardım eteler, onıñ içün men buña ameliyatqa kibi davranam» – dedi İlyasov.
İlyasov Qurultay delegatı ve Meclis azası olğanını hatırlattı.
«Menim vazifem – üstüme farqlı rutbe asmaq ya da tac taqıp, lider menim demek ve bir şey yapmamaq degil, qırımtatar halqınıñ problemlerini al etmektir. Mende böyle bir şey yoq», – dedi o.
Remzi İlyasovğa onıñ Qırımtatar Milliy Meclis reisi Refat Çubarov ve qırımtatar halqınıñ lideri Mustafa Cemilev ile dialog barmı degen sualge o, böyle cevap berdi: «Men olarnıñ iç bir lafını ahlâqiy sebeplerden izaatlamayım».
Hatırlatamız, tünevin Aksönov İlyasovnı qırımtatar halqınıñ lideri dep adladı. Cumhuriyet yolbaşçısı «Qırım» cemaat areketinen yapqan işbirligini qayd etti.
2014 senesi fevral soñunda mart başında Rusiye ve Rusiyeniñ Qara deñiz flotunda olğan askerler Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalar kirsetti. Ğarp Qırım Ukrainağa bağlı olğanını tekrarlamağa devam ete.