Türkiye Qırımtatar milliy Qurultayınıñ keçirilmesi içün kendi territoriyasını bermege azır, dep bildirdi Türkiye tışqı işler naziri Mevlüt Çavuşoğlu Kiyevdeki matbuat-konferentsiyasında .
«Biz Qurultaynıñ ya Türkiyede, ya Ukrainada, ya da diger bir yerde keçirilüv meselesini muzakere ettik»,– dedi Türkiye tışqı işler naziri. – Qurultaynıñ başqa bir yerde ötkerilmesiniñ müsbet ve menfiy taraflarını bütünley ögrenmek kerekmiz».
Türkiye tışqı işler naziri şunı da qayd etti ki, işbu mesele boyunca muzakereler devam etmekte.
Qırımtatarlarnıñ milliy yetekçisi Mustafa Cemilev Meclisniñ yañı erkânı saylanacaq Qırımtatar milliy Qurultayınıñ nevbetteki toplaşuvınıñ İstanbulda keçirile bilecegi aqqında bildirgen edi. Bunıñ ile o, Türkiyede ötkerilecek toplaşuvdan soñ qırımtatarlarnıñ bir qısmını yarımadağa keri kirsetmeyceklerini de inkâr etmey.