Qırım sağlıq saqlav «naziri» istifağa çıqtı

İşğal etilgen Qırımda sağlıq saqlav «naziri» Aleksandr Baharev istifağa çıqtı.

Bunı cumaaqşamı künü, noyabr 6-da, Qırımnıñ öz başına ilân etilgen baş naziri Sergey Aksönov bildirdi, – dep haber ete Qırımnıñ öz başına ilân etilgen ükümet «ruporı» Krıminform saytı.

İstifa sebepleri aydınlatılmay.

Bundan evel Aksönov işğal etilgen Qırımda sağlıq saqlav saasındaki işlernen memnün olmağanını bildirgen edi. «Teşkerüvler» neticesinde «baş nazir» Semaşko adına hastahanesiniñ baş ekimini işten boşatmağa talap etti.

Aksönovnıñ zanınca, Qırımdaki devlet hastahaneleriniñ reberleri «donatma ve ilâclarnıñ satın alınmasını suniy alda toqtatalar».

2014 senesi mart 16-da Qırımda ve Aqyar şeerinde yarımada statusı aqqında «referendum» olıp keçti. Onıñ neticesinde Rusiye Qırımnı öz terkibine qabul etti. Ne Ukraina, ne Avropa Birligi, ne de Amerika Qoşma Ştatları işbu rey berüvni tanıp, Qırım Rusiye işğaliniñ altında olğanını aytalar.