Al-azırda Ukraina cenüp-şarqında bulunğan OSCE mahsus nezaret missiyasınıñ faaliyeti Qırımda olmamalı, dep bildirdi OSCE yanında Rusiye Federatsiyasınıñ vekili Andrey Kelin Venadaki teşkilâtnıñ daimiy şura toplaşuvında.
Diplomatnıñ maruza metni Rusiye Tışqı işler nazirligi saytında derc etildi.
Onıñ aytqanına köre, missiyanıñ coğrafik alanı ve vazifeleriniñ mandatı 2014 senesi mart 21-de belgilendi.
«O, Qırım ve Aqyar Rusiye Federatsiyasınıñ ayırılmaz parçası olğanından sebep o vaqıt belgilengen siyasiy-uquqiy kerçeklerni aks ete. Böylece, missiyanıñ faaliyeti, şu cümleden informatsion ceetinden, Qırım yarımadasına tesir etmemeli», – dedi Kelin.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.