Aqmescit – Kefeniñ appelâtsion mahkemesi Özbekistandan yarımadağa köçip kelgen altı insandan ibaret qorantanı sürgün etmek aqqında qararnı red etti. Mahkeme toplaşuvında, bu iş daa bir kere baqılacağı aqqında qarar alındı. «Devlet milletler komitetinde» Qırımdan iç bir kimseni sürgün etmeyceklerini bildirdiler.
Qırım.Aqiqat İslâm Terek civarındaki Qızıl Terçek köyüne köçken Oksana Tolmaçövanıñ qorantası aqqında ikâye etken edi. Hatırlatamız, oktâbrniñ ortasında İslâm Terek rayon mahkemesi Oksana ve qorantasını sürgün etmege qarar aldı, bunen beraber, Rusiye Federatsiyasında bulunuv müddetini bozğanları içün er azağa 2 biñ ruble miqdarında para cöremesini belgiledi. Bu ceza altına Oksananıñ ihtiyar yaşında ana-babası, aqayı Vitaliy ve eki küçük balası tüşti. Qoranta Özbekistandan mayısta Qırımğa köçip keldi. 90 kün içinde olar cumhuriyetni terk etmege kerek ediler, amma bunı yapmadılar. O vaqıt mahkeme qorantanı sürgün etmege qarar aldı.
Salı künü, oktâbrniñ 28-nde Kefede Appelâtsion mahkemesiniñ toplaşuvı ötkerildi, anda Tolmaçöv qorantasınıñ şikâyeti baqıldı. Oksana Tolmaçövanıñ adliyecisi Emil Kürbedinov Qırım.Aqiqatqa bildirgeni kibi, şikâyette İslâm Terek mahkemesi alğan qararnı lâğu etmege rica etildi.
Sürgün etilüv aqqında mahkeme qararı
«Rayon mahkemesiniñ bu qararı bozuluvlarnen qabul etildi. Hususan, qoranta azaları qayd etilüvni bozğanlarında qabaatlanalar, amma, Rusiye Federatsiyası qanunlarına köre, çetel vatandaşlarnı qabul etken devlet qayd etmek kerek. Bundan da ğayrı, mahkeme ötkerilgende, qoranta Rusiyede tek eki kün buluna edi, çünki olar Qırımdan tış barıp keldiler. Faqat İslâm Terek mahkemesi bunı közge almadı», – dedi adliyeci.
Onıñ sözlerine köre, appelâtsion mahkemesi buña emiyet berdi, ve evelden qabul etilgen qararnı lâğu etti, amma işni ğayrıdan baqılmasını avale etti. Kürbedinov, yañı mahkemeniñ neticeleri müsbet olacağına işana. «Seslendirilgen qabaatlavlar esasında olarnı para cöremesine oğratmazlar ve sürgün etmezler», – dedi adliyeci.
«Yüküm yengilleşti»
Oksana Qırım.Aqiqatqa aytqanı kibi, Kefeniñ Appelâtsion mahkemesi alğan qararına pek quvandı. «Yüküm yengilleşti. Elbette, er şey daa soñuna qadar al etilmedi, amma, endi qolayca oldı. Adliyecilerge ve yardım etken er keske teşekkurler bildirem. Bu işniñ soñuna çıqarmız», – dedi Tolmaçöva.
Bunen beraber, o, evelden Federal migratsion hızmeti red etken vaqtınca yaşamaq içün ruhsetname qorantanıñ er azasına berilecegine ümüt ete. Bu kibi vaziyetke tüşken insanlarğa, Oksana Aqmescitke barıp yardım soramağa tevsiye etti, çünki Federal Migratsion Hızmetiniñ yerli bölüginde sert ve qaba davranışqa oğramaq mümkün.
Zaur Smirnov
«Devlet milletler komiteti» reisi Zaur Smirnov Qırım.Aqiqatqa bildirgeni kibi, kerçekten de bu kibi vaqialar yüz bere. «Umumiy bir belâ. Merkezde nasıldır bu meseleni çezemiz, amma yerli bölüklerde biraz sertçe davranalar. Yazıq ki, bu kibi şeyler ola, onıñ içün er vaziyetke ayırıca yanaşmaq, kirişmek ve soñra qara almaq kerek», – dey o.
Smirnov işandırğanına köre, Qırımdan iç bir kimseni sürgün etmeycekler. «Meseleler bar, añlaşılmamazlıqlar bar, olarnı çezmek kerek, amma mahkeme ve ya Federal Migratsion hızmetini qabaatlamağa mümkün degil, çünki olar qanun boyunca areket eteler», – dedi Smirnov.
Human Rights Watch uquq qorçalayıcı teşkilâtta Kefe Appelâtsion mahkemesiniñ qararını alğışladılar. Amma, mahkeme adliyecilerniñ ricalarını bütünley yerine ketirse edi, daa yahşı olur edi, deyler.
«Er alda, mahkeme azırlanıp, adliyecinen kelirler. Birinci sefer adliyecini tapmağa bile vaqıtları yoq edi, yani olarnıñ qorçalanmaq aqkqını yerine ketirmege imkânları yoq edi», – dep ayttı Qırım.Aqiqatqa teşkilât tedqiqatçısı Yuliya Gorbunova.
Gorbunova işandırganı kibi, Human Rights Watch Tolmaçövlar qorantasınıñ vaziyetini taqip etecek.