Cumaertesi künü, oktâbr 25-te, Ukrainada nevbetten tış parlament saylavları arfesinde «sessizlik künü» keçe.
Yuqarı Rada nevbetten tış saylavlarınen bağlı bir de bir teşviqat yasaq etile. İçtimaiy tedqiqler ve cemaat fikirlerini ögrenüvlerniñ neticelerini aydınlatmaq da yasaqtır.
Cuma künü Ukraina milliy havfsızlıq ve mudafaa şurasınıñ reisi Andriy Lısenko bildirdi ki, cumaertesi ve bazar künleri adamlarnı qorquzmaq ve saylavlarnı bozmaq maqsadında bir sıra yañlış malümatlar tarqatılacaq, dep haber ete Azatlıq Radiosı.
Lısenko kütleviy haber vastalarını teşkerilmegen malümatlarnı tarqatmamağa ve yalıñı resmiy qaynaqlardan izaat istemege çağırdı.
Saylavlarda majoritar bölgelerde 29 firqa ve namzet qayd etildi.
Nevbetten tış parlament saylavlarını keçirmekniñ sebebi «Yevropeyskiy vıbor» parlament koalitsiyasınıñ dağıtılması oldı – iyül 24-te onıñ erkânından «Svoboda» ve «UDAR» fraktsiyalarınıñ azaları çıqtılar.
Avgust 26-da Ukraina prezidenti Petro Poroşenko Yuqarı Rada vekâletlerini toqtattı ve oktâbr 26-na nevbetten tış parlament saylavlarınıñ keçirilmesini belgiledi.
Malüm olğanı kibi, aqımdaki seneniñ fevral 22-de prezident Viktor Yanukoviçniñ rejimi yoq etilgen soñ, mayıs 25-te nevbetten tış prezident saylavlarında Petro Poroşenko ğalebe qazandı, 2004 senesiniñ anayasası ğayrıdan tiklenildi ve Ukraina parlament-prezident cumhuriyetine çevirildi.