Oktâbr 22-de Eski Qırımda politsiya hadimleri tarafından yaqalanğan qırımtatar faali Tair Smedlâyev Aqmescitteki Franko bulvarında yerleşken vaqtınca tutuv izolâtorına ketirildi.
Yaqalanğan adamnıñ ağası – Qurultaynıñ Merkeziy saylav komissiya reisi Zair Smedlâyev Qırım.Aqiqatqa bergen malümatına köre, Tair yaramadı.
«Onıñ basımı yükseldi, «aceleni» çağırdılar, ekimler ine, elektrokardiogrammanı yaptılar», – dep bildirdi Smedlâyev.
Yaqalanğannıñ adliyecisi keldi. Yaqın zamanda Tair Smedlâyev İVS binasında olacaq. Onıñ anda bulunacaq müddeti belli degil. Zair Smedlâyev eki kün soñra onıñ qardaşına ceza belgileycek mahkeme ötkerilecegini tahmin ete.
Qırımtatar Milliy Qurultayı Merkeziy saylav komissiyasınıñ reisi Zair Smedlâyev onıñ qardaşını nede şeklegenlerini aytıp olamadı. Madem ki, Tair Smedlâyev mayıs 3-te Ermeni Bazarda qırımtatarlarnıñ lideri Mustafa Cemilevni qarşılağan insanlar arasında bar edi.
Qırım.Aqiqat bildire ki, Tair Smedlâyevni çarşenbe künü, oktâbr 22-de, Eski Qırımda yolda yaqaladılar. «Politsiya» hadimleri Smedlâyev ve onıñ eki oğlu, şu cümleden 4 yaşında küçün oğlu, olğan maşinanı blok ettiler.
Hatırlatamız, işğal etilgen Qırımda Qurman qasabasında eki qırımtatarını yaqalap, apiske aldılar. Olarnı mayıs 3-te Ermeni Bazarda qırımtatar halqınıñ lideri Mustafa Cemilevni qarşılağan vaqıtta uquq qoruyıcı organlarnıñ hadimlerine ketirilgen zararda şekleyler.