Aqmescit – Rusiye İçki İşler Nazirliginde Qırımda avtomobil mekteplerniñ qısqartıluvı aqqında haber ettiler. Esas sebep – 2014 senesi avgust ayından başlap, vesiqalarnıñ yañı qaideler boyunca berilüvidir. Mekteplerde vesiqalarnı elde etip, yañı yıldan soñ, çalışmağa devam eteceklerine ümüt besleyler. Amma, bugünki künde aydamağa ögrenmege istegenler belli bir qolaysızlıqlarnen qarşılaşalar.
Bugünki künde Qırımda 69 avtomobil mektebi mevcut, amma, olarnıñ sayısı adım-adım qısqartılacaq. Bu malümatnı Aqmescitte matbuat-konferentsiyası devamında Rusiye İçki İşler Nazirliginiñ yol areketi havfsızlığını temin etken Baş idareniñ reberi muavini Vladimir Şvetsov ayttı.
Onıñ sözlerine köre, rusiyeli avtomobil mektepleri de ağır vaziyette bulunalar, çünki litsenziya ile bağlı yañı qaideler 2014 senesi avgust ayında kirsetildi. «Qırımda biz bir kimseni aşıqtırmaycaqmız», – dedi Vladimir Şvetsov. («Krım Media»dan alınğan tsitata). Ukraina zamanında berilgen vesiqalar 2016 senesi yanvarniñ 1-ne qadar çalışacaqlar. «Amma, bu vaqıtqa qadar müddeti yekünlese, yañı rusiyeli qanunlarına binaen almağa kerek olacaq», – dedi o.
Yañı litsenziyanı almaq içün, mektepler donatmalarnı Devlet Avtoinspektsiyası tarafından tasdiqlamaq mecburlar. Avtomobil mektepleri yañı talaplarğa uymaq kerekler – 0,24 ga meydançığı, tibbiy donatmaları olmalı. Bundan da ğayrı, mektepniñ saytı olmaq kerek, nizamı qabul etilmeli, ocaları aliy tasilli olmalı.
Şevtsovnıñ malümatına köre, bugünge qadar Qırımda qayd etilgen 69 mektepten iç biri donatmalarnı köstermek ve uyğunlaştırmaq içün ariza bermedi. Aqyarda 8 mektepten 3 mektep ariza yolladı.
Oqutuv fiyatı paalılaşa
Qırım.Aqiqat muracaat etken bir sıra mektep vekilleri, yañı talaplarğa baqmadan, 2015 seyenesi de faaliyetlerini devam ettireceklerini ayttılar. Litsenziyanıñ aluvınen problemler çıqmaz, deyler.
Aqmescitteki Kirov 1, caddesinde yerleşken DOSAAF mektebinde, «V» kategoriyasınıñ aydavcılıq vesiqalarını almağa istegenler, 2015 senesiniñ fevral 9 kününden başlap, cedvelge yazıla bileler, şimdi ise yer yoq. Oquş fiyatı 22 biñ ruble etrafında olacaq, şimdi 20 biñ ruble tura. Oquv müddeti 3 ay.
«2015 senesi yanvarniñ 1-nden bizim mektebimiz işini devam etecek, – dedi Qırım.Aqiqatqa mektep vekili. – Nasıl olsun, bütün mektepler öz işini toqtatsın. Em de, mudafaa nazirligi (Rusiye. – Müel. qaydl.) mutlaqa yaş askelerni oquşqa yollamaq kerek».
Aqmescitniñ Mayakovskiy, 6 menzili boyunca yerleşken Qırım devlet avtouçkombinat tamam bu kibi vaziyetti. Mında gruppanı fevralniñ 9-ndan başlap tertip etecekler.
Aqmescitniñ Kreyzer soqağındaki mektepte bu seneniñ dekabr 10 kününden başlap oquycaq gruppağa boş yerler bar, deyler. «Oquşnıñ fiyatı 17 biñ ruble etrafında, buña daa A-95 benzinniñ 100 litrni almaq kerek. Oquş eki ay devam ete», – dediler mektep vekilleri. Aynı zamanda, bu talaplar şartlı olğanını ayttılar: «Oquş müddeti ve parası arta bile – kelecek afta daa tekmil bilecekmiz». Bundan evel aydavcılıq kurslarına yazılğanlar, oquş içün 12 biñ berip, daa 100 litr benzin içün para berecekler.
Çehov 2, menzili boyunca avtomobil mektebinde oquşqa bir kimseni almaylar. «Oquşnıñ konkret müddeti ve fiyatını daa bilmeymiz»– dep añlattılar mektepte. Qırım.Aqiqatqa bildirgenleri kibi, Ukraina tasil, ilim ve yaşlar nazirliginden alğan vesiqalar 2015 senesiniñ mayısnıñ 25 qadar kerçek sayılacaq.
Avtomobil mektepleri saasınıñ kerginleşüvi?
Aynı zamanda rusiyeli Matbuat vastaları qasvetleneler: memlekette avtomobil mekteplerniñ ekseriyeti qapatılmaq mümkün. Yañı qaidelerge uyğun olmamaları içün, er dörtünci mektep faaliyetlerini devam ettirip olur, dep yaza Gazeta.ru.
«Gildiya avtoşkol» idaresiniñ reisi Sergey Lobarevniñ aytqanına köre, mekteplerniñ eñ büyük meselesi - 0,24 ga meydançıqnı tapmaq problemasıdır. Moskvanıñ özünde bu kibi meydançıqnı ayırmaq içün arizanı bir ay devamında baqalar. Ekspertler esaplağanları kibi, bütün kerekli donatmalarnı almaq içün mektepler 300 biñ ruble sarf etmeliler. Böyle etip, oquş fiyatları da eki qat artacaq. Moskvada talebeler 45 biñ ruble bergen olsalar, ileride 80-100 biñ ruble bermeleri mümkün.
Moskva avtomobil mektepleri birleşmesi icra müdiri Yelena Zaytseva aytqanı kibi, bu vaziyet avtomobil mektepleri saasınıñ kerginleşüvine ketirecek. Devlet avtoinspektsiyasında ise, er şey yerinde, attestatsiya devam etkeni ve mekteplerde şamata olmağanını bildireler.