Qırımnıñ öz başına ilân etilgen baş naziri Sergey Aksönov Ukraina prezidenti Petro Poroşenkonıñ oktâbrniñ 14-ni Ukraina imayecisi Künü olaraq ilân etmek qararını Ukrainada gumanitar felâket olğanınıñ isbatı, dep adladı.
Qırımnıñ öz başına ilân etilgen ükümet ruporı olğan Krıminform saytı aydınlatqan Aksönovnıñ beyanatında aytıla ki, «prezident Poroşenkonıñ oktâbr 14-ni, UPA meydanğa ketirilmesiniñ kününi – Ukraina imayecisi Künü olaraq ilân etmek qararı bir Vatanımıznıñ mustaqilligi içün küreşken ve onıñ Silâlı quvetlerinde hızmet etken bir qaç nesilniñ açuvını ve takbihini doğura».
Azatlıq Radiosı az evel bergen malümatqa köre, prezident Petro Poroşenko oktâbrniñ 14-ni Ukraina imayecisi Künü olaraq belgiledi. Böyle bir qarar «Ukraina mustaqilligi ve topraq bütünligi, arbiy ananeler ve ukrain halqı zaferleriniñ imayecilerine sayğı köstermek» maqsadında qabul etildi.
Petro Poroşenkonıñ zanınca, Zaporojye kazaklarınıñ esas bayramlarından biri olğan kün artıq yañı Ukraina taqviminde esas bayramlarından biri olacaq. Buyruqqa binaen, Ukraina prezidentiniñ 1999 senesi fevral 23-ne ait «Vatan imayecisi Künü aqqında» buyruğı lâğu etile.