ATR qırımtatar telekanalı añlı olaraq Rusiyege qarşı siyasetini alıp bara, Qırım Rusiye terkibine qırımtatarlarnıñ istegi olmadan kirgeni aqqında fikirni tarqata. Rusiye qıtaiy qısmında bu kibi areketler yasaq etile, Qırımda ise daa yoq. Bu kibi fikirni Qırım «cemiyet palatası» reisiniñ muavini, siyasetşınas Aleksandr Formançuk Qırım «parlamenti»niñ Krımskiye izvestiya neşirine bildirdi.
«Onıñ (ATR telekanalınıñ – muar.) haberleri tek merkeziy degil de, yerli akimiyet ve qırım yolbaşçılığınıñ sayğısını yoq etmege çalışa», – dey Aleksandr Formançuk. Onıñ fikrine köre, qırımtatar telekanalınıñ siyasetine küç tertibatlarnıñ seslenüvi olmalı.
Александр Форманчук
«Rusiye devleti öz milliy menfaatını qorumaq meselede ğayet ciddiydir, Ukrainağa ait olğan serbestlikke yol bermey. Rusiye qıtaiy qısmında bu kibi areketler yasaq etile, Qırımda ise daa yoq. Bu etilecek dep ümüt besleyim. Em de eali ile terbiyeviy subetni çoqtan keçirmeli», – dep tüşüne Formançuk.
O şunı bildire ki, qırımtatarlarnıñ ayırımı aqqında liderlerniñ aytqanları tariktir eken.
«Qırım – Ğarpnıñ Rusiye Federatsiyasına qarşı küreşte faydalanğan cenkniñ cebe tarafındaki qısmı olğanını hatırlatmaq kerek. Bunı nazarımız altında tutmalımız ve bu kibi tariklerniñ ögüni almaq kerekmiz», – dedi Formançuk.
Sentâbr ayında ATR qırımtatar telekanalına qarşı ekstremizm faaliyeti aqqında qabaat endi çıqarılğan edi.
Evel qırımtatarlarnıñ yetekçisi Mustafa Cemilev onı efirde köstergen ATR telekanalını qapatacaq olğanı aqqında bildirgen edi.