Aqmescit civarında yüz bergen maşina yolunıñ omravını ögrenmek içün Qırımğa Rusiye Federatsiyasınıñ çeşit regionlarından mütehassıslar keldi. İşbu qazanıñ neticesinde 6 insan elâk olğan edi.
Bunı Aqmescitte keçirilgen konferentsiyada Qırım naqliyat «naziri»niñ vazifelerini eda etken Anatoliy Tsirkun bildirdi.
«Al-azırda Rusiye Federatsiyasınıñ çeşit regionlarından: Voronej, Sankt-Peterburg ve Uzaq Şarqtan kelgen mütehassıslar Qırımda taqiqat işlerine qoşuldılar», – dedi o.
Tsirkun şunı da qayd etti ki, işbu yol inşaatınıñ omravı sebebini içveç istisalcı-şirket ile ögrenecekler.
Qırım.Aqiqat bergen malümatqa köre, sentâbr 28-de gece saat 03.30 Aqmescit-Nikolayevka aylanma yolunda yol örtüsü omradı – adamlarnen tolu VAZ maşinası çuqurğa oğradı. Altı insan, şu cümleden eki bala, elâk oldılar.
Kütleviy haber vastalarınıñ malümatına köre, Aqmescitte omrağan «Dubki-Levadki» yolu soñki beş yıl devamında Qırımnıñ eñ paalı qurucılıq obyektlerinden biri edi. PAO «Yujdorstroy» er daim yol qurucılıq imkânlarını qazana edi. Qırımda Rusiye Taqiqat komitetiniñ Baş taqiqat idaresi maşina yolunıñ omravı boyunca cinaiy iş açtı.
Qırımnıñ öz başına ilân etilgen «baş naziri» Sergey Aksönov yol omravını ögrenecek ükümet komissiyasını acele sürette meydanğa ketirmege emir etti ve vefat etkenlerniñ soy-soplarına 400-er biñ ruble berecegini vade etti.
Sentâbr 29-da saat 11-de Aqmescitniñ Borçoqraq (Fontanı) qasabasında Aqmescitniñ aylanma yolunda yüz bergen yol eşilüvi aqibetinde elâk olğan 37 yaşında Asiye Salimova ve onıñ 16 yaşında qızı Aliyeniñ cenaze merasimi olıp keçti.
Yol qazasında yaralanğan bir yaşında Selim oğlançıqnı sentâbr 29 künü Moskvağa ketirdiler. Oğlançıq essizdir.