Qarasuvbazar civarında Sarı-Su qasabasında tutıp esir alınğan qırımtatarlardan biriniñ babası Abdureşit Cepparov Qırımnıñ öz başına ilân etilgen «baş naziri» Sergey Aksönov ile körüşmek içün Aqmescitke yol aldı.
Qırım.Aqiqat mühbiri bildire ki, böyle bir qarar esir alınğan balalarnıñ evi yanında toplaşqan qırımtatar areketiniñ veteranları ile körüşüvde Cepparov tarafından qabul etildi.
Toplaşuv vaqtında yerli imam gençlerniñ tez-tez evge keri qaytması ve sağlıqları içün dua oqudı.
Hatırlatamız, bugün Qarasuvbazar civarındaki Sarı-Su qasabasında esir alınğan qırımtatarlarnıñ evi yanında tahminen 50 insan toplaştı. Olarnıñ arasında yerli meclis reisi Mustafa Asaba ve Qarasuvbazar şeer reisi Albert Kangiyev bar ediler.
Abdureşit Cepparovnıñ aytqanına köre, Qırım parlamentiniñ spiker muavini Remzi İlyasov bu vaqia taqiqatını şahsen ögrenecegini bildirdi.
Ceparovnıñ malümatına köre, vaqia künü «politsiya» evdeki bilgisayar sistem blokunı ve tiş fırçılarını alıp ketti. Uquq qoruyıcılarnıñ bildirgenine köre, böyle etip DNK teşkerüvini keçirmege mümkün olacaq.
Bundan eve Abdureşit Cepparov soy-soplarnı saba qaytaracaqlarını bildirgen edi.
«Şimdilik bir şey belli degil. Sessizlik. Ancaq tünevin aqşam üstü telefon etip, sabağa qadar olar olacağını ayttılar, lâkin saat 11 oldı ve bir şey yoq, – dep ayttı esir alınğan oğlanlarnıñ soyu. – Hızmetler ve Nazirler Şurası da sabağa qadar bir şey belli olacaq, dep aytqan ediler. Anda tanışlarımız çalışa, olar da sabağa qadar beklenile, dep bildirdiler, lâkin üyle vaqıtı yaqınlaşa ve bir şey yoq».
Qırım.Aqiqat bergen malümatqa köre, Qarasuvbazar civarında belgisiz şahıslar eki genç qırımtatarını maşinağa oturtıp, belgisiz bir yerge alıp kettiler.
Bu aqqında gençlerden biriniñ babası Abdureşit Cepparov bildirdi.
Onıñ aytqanına köre, vaqia bugün saat 19.00 Sarı-Su mikrorayonında olıp keçti.
Cepparov birden Qarasuvbaza boyunca politsiya ve FSB bölügine muracaat etti, amma anda bundan haberleri olmağanlarını bildirdiler.
Eki genç qırımtatarını tutıp esir alıp, oturtqan maşina mavı tüste Volkswagen Transporter, qayd etüv işareti 755, 82-nci regionğa ait.