Aqmescitte Samokiş soq., 8 adresi boyunca yerleşken İsmail Gasprinskiy adına qırımtatar kitaphanesinde yuridik şahısnı yoq eteler.
Mütenasip qarar kitaphane saytında aşkâr etildi.
«Qırım Cumhuriyeti nazirler Şurasınıñ 2014 senesi avgust 19 künü alınğan № 801-r «Qırım cumhuriyet kitaphanelerniñ yoq etilüvi ve devlet bücet müessiselerniñ teşkil etilmesi» avalesine binayen «İsmail Gasprinskiy adına qırımtatar kitaphanesi» Qırım cumhuriyet müessisesi yoq etile», – denile beyanatta.
Mında şunı da qayd ettiler ki, «İsmail Gasprinskiy adına qırımtatar kitaphanesi» Qırım cumhuriyet müessisesiniñ ödünç bergenlerniñ talapları eki ay içerisinde: 295011, Qırım Cumhuriyeti, Aqmescit şeeri, Samokiş soq, 8 adresi boyunca bildirile bile.
İ. Gasprinskiy adına kitaphane 1990 senesi sentâbr 24 künü açıldı. 1995 senesine kitaphanede 8 biñ kitap ve diger neşirler bar edi. Faqat kitaphane-filial şekilde müessise qırımtatarlarnıñ ihtiyaclarını yerine ketirmey edi. Şunıñ içün 1995 senesi dekabr 16 künü filial negizinde «İsmail Gasprinskiy adına qırımtatar kitaphanesi» Qırım cumhuriyet müessisesi teşkil etildi.