Ukraina çetel işler naziri Pavlo Klimkin milliy azlıqlarnıñ işleri boyunca ОBSE yuqarı komissarı Astrid Tors ile sentâbr 16 künü keçirilgen körüşüvde Rusiye Federatsiyası tarafından Ukrainağa nisbeten olğan istilâ ve Qırım yarımadasınıñ işğali neticesinde milliy azlıqlarnıñ aqlarınıñ teminlevini muzakere etti.
Bu aqta Ukraina çetel işler nazirliginiñ matbuat hızmeti bildire.
«Qırım Muhtar Cumhuriyetinde milliy azlıqlarnıñ aqları ve azatlığınıñ teminlevi saasında vaziyetniñ kerginleşmesi pek ciddiy bir meseledir. Yarımadada yaşağan qavmiy ukrain ve qırımtatarlarnıñ aqları bozula. Ukraina qanunları ve Anayasasında belgilengen vaqtınca işğal etilgen territoriyada yaşağan vatandaşlarnıñ aqlarınıñ bozuluvı boyunca mesüliet Rusiye Federatsiyasına aittir», – dedi Pavlo Klimkin.
Qırım.Aqiqat bergen malümatına köre, saba sentâbr 16 künü qırımtatar milliy Meclis azası Eskender Bariyevniñ evinde de tintüv keçirildi, neticede onıñ bilgisayarı tutıp alındı.
Bundan soñ qırımtatar milliy Meclis binasını da sarıp aldılar, anda şimdi tintüvler keçirile.