Aqmescitniñ 7-nci hastahanesinde yerleşken №266 saylav bölüginde saylayıcılarnıñ sayısı alçaqtır. Künniñ soñuna qadar vaziyetniñ deñişecegini beklegen saylav bölüginiñ azaları bu sebepten qasevet çekeler.
İşbu bölükniñ territoriyasında esasen qırımtatarlar yaşay – «Bor çoqraq» qasabasınıñ ealisi.
Bölükte bulunğan Qırım.Aqiqat neşiriniñ mühbiri 20 daqiqa devamında tek 4 saylayıcını kördi. Territorial komissiya hadimleri işsiz oturalar.
Jurnalistler ile qonuşqan saylav bölüginiñ reisi Yelena Agapova künniñ soñuna qadar saylayıcılarnıñ sayısı tahminen 40% olacağına ümütini bildirdi.
«Biz saylayıcılarnıñ 40% kelecegini bekleymiz. Azırlana edik, insanlarnıñ rey berecegini isteymiz»,– dey o.
Agapovanıñ sözlerine köre, müdetten evel bu bölükte 25 insan rey berdi.
O şunı da qayd etti ki, «referendum» devamında mart 16 künü bu bölükte saylayıcılarnıñ sayısı daa da alçaq edi.
İşbu bölükte tahminen 2000 insan qayd etildi.
Evelki malümatqa köre, Aqmescitniñ Boğurça qasabasındaki milliy mektepte yerleşken 353 sanlı saylav bölüginde bildirgenileri kibi, qırımtatarlar saylavlarğa suvuq yanaştılar.
Qırımtatar milliy areketniñ vekili, Qurıltaynıñ merkeziy saylav komissiyasınıñ reberi Zair Smedlâyevniñ bildirgenine köre, sıqıştıruvğa baqmadan, saylavlarda iştirak etken qırımtatarlarnıñ sayısı 10%- nı teşkil etecek.
Bazar künü, sentâbrniñ 14-nde işğal etilgen Qırımda birinci kere Rusiye qanunlarına köre, «Devlet şurası», Aqyarda ise, «Şeerniñ qanun çıqarıcı toplaşuvı» akimiyet organlarına saylavlar başlandı. Bunen beraber yerli akimiyet organlarna da saylavlar ötkerile.
Ukraina baş prokuraturası, Qırım Muhtar Cumhuriyetinde qanunsız saylavlarnıñ ötkerilüvi cinayetçilik olğanını hatırlattı.