Rusiye mudafaa naziri Sergey Şoygu Donetsk civarında tüşken «Boeing» içün mesülietni Ukraina reberliine yükledi.
Şoygu Malayziya mudafaa naziri ile körüşip, Ukraina kendi problemlerini «küç qullanmayıp» çezse edi, facia da olmaz edi, dep ayttı, haber ete Azatlıq Radiosı.
Malayziya arbiy nazirliginiñ yolbaşçısı Hişamuddin Huseyn «Boeing» faciasınıñ taqiqatını muzakere etmek içün çarşenbe künü Moskvağa keldi. Tünevin nazir Kiyevde bulunıp, uçaq qazasınıñ taqiqatı boyunca Ukraina devlet komissiyasınıñ yolbaşçısı Vladimir Groysman ile körüşti. Rusiye ziyaretinden soñ Malayziya naziri Felemenkke yol alacaq.
Malaysia Airlines şirketine ait «Boeing-777» iyül 17-de Donetsk civarında tüşti. Ukraina akimiyeti bu qazada Rusiyege qol tutqan memleket şarqındaki separatistlerni qabaatlay.
Salı künü Felemenk havfsızlıq Keñeşi Malaysia Airlines MH17 şirketiniñ uçaq felâketi aqqında taqiqat komissiyasınıñ birinci esabatını aydınlattı. Ekspertlerniñ zanınca, uçaqqa «tıştan» bir de bir obyekt tüşti, lâkin raketa çeşiti aytılmay.