Сumaaqşamı künü Ukraina Yuqarı Radasınıñ qapalı toplaşuvında üç türlü sualler baqılacaq: Rusiye istilâsına cevap, Qırım ve terrorizmge qarşı tedbirler keçirilgen yerlerden köçip kelgenlerniñ abadanlaştıruvı, em de ükümetniñ buhranğa qarşı tedbirleri, dep haber ete fraktsiyadan tış halq deputatı Anatoliy Gritsenko, yaza İnterfaks-Ukraina.
«Radanıñ qapalı toplaşuvı. Mündericesini aytmaycam, çünki o qapalıdır. Lâkin kün tertibi – gizli degil. Arbiy vaziyet kirsetilmesi aqqında laf ketmey – prezidentniñ böyle bir qararı yoq. Bir de bir qanun leyhaları da qabul etilmeycek, olarnı kün tertibine kirsetmediler», – dep yazdı Gritsenko Facebook saifesinde.
Onıñ aytqanına köre, eñ evelâ «Rusiye istilâsı ve oña qarşı areketler» kibi meseleler baqılacaq.
Ekinciden, «Qırım ve ATO yerlerinden köçip kelgenlerniñ abadanlaştıruvı boyunca ükümet işi» muzakere etilecek.
Ukraina Fevqulâde vaziyetler hızmetiniñ malümatına köre, sentâbrniñ 4-ne qadar Qırım Muhtar Cumhuriyeti ve Aqyardan köçip kelgen adamlarnıñ sayısı 17 biñ 213 insannı teşkil etti, olardan – 4 biñ 801 bala, 1 biñ 243 kişi – saqat ve esli başlı adamlardır.