Yañı oquv yılında №5 I-III seviyeli qırımtatar Bağçasaray umumtasil mektebinde birinci sınıfta 82 talebe bilgi alacaq.
Bunı Bilgi kününe bağışlanğan tantanalı tedbirde mektep müdiri Dilâra Kurtumerova bildirdi, dep haber ete Qırım.Aqiqat mühbiri.
Tantanalı tedbirde mektep reberligi «Devlet şura» spikeri Vladimir Konstantinovnıñ mektübini ve Qırımğa kirişi 5 yılğa qadar yasaq etilgen Qırımtatar Milliy Meclisiniñ reisi Refat Çubarovnıñ hayırlav beyanatını seslendirdiler.
Başlanğıç sınıf ocası Aliye İbragimovanıñ Qırım.Aqiqat saytına bergen malümatına köre, Bağçasaraydaki milliy mektepniñ birinci yıllarına baqqanda, şimdi birinci sınıf talebeleriniñ sayısı on qat arttı.
«Men birinci sınıflarnı alğanda, masa üstünde dört ariza bar edi, sınıfta ise doquz talebe otura edi, – dep ayta oca. – Çoq olğanımız, ana-babalarnıñ milliy mektepke emiyet bergenleri quvandıra. Mında, kerçekten de, «qırımtatar müiti» em talebelerde, em ocalarda. Balalar yahşı şaraitlerde öseler, bizler – qırımtatarlarmız, Qırım – Vatanımız olğanını añlaylar».
Başlanğıç sınıflarınıñ programmasında, İbragimovanıñ aytqanına köre, ukrain tilini alıp taşladılar ve rus tili derslerini qoştılar.
Tantanalı tedbirde Bağçasaray regional meclisiniñ reisi Ahtem Çiygoz de çıqışta bulunıp, milliy terbiye ananelerini közde tutmağa ve ana tilini yañıdan yaşatmağa çağırdı.
Bağçasaray umumtasil mektebiniñ müdiri Dilâra Kurtumerova qırımtatar şairi Şakir Selimniñ «qırımtatarı bir köznen küle, ekincisinen ağlay» degen laflarını seslendirip, bu sene milliy mektepte talebeler sayısınıñ artqanına quvanmağa çağırdı.
«Birinci çañ» bayramında Rusiye Federatsiyası, «Qırım Cumhuriyeti» ve qırımtatar milliy gimnleri yanğıradılar. İlki derslerni Vatan ve vatanperverlik mevzusına bağışladılar.