Qarasuvbazar şeer şurası avgust 25 künü şeer başı muavini Akim Çolаhayevni istifağa yolladı, amma Qarasuvbazar şeer başı Albert Kangiyev bu qararnı qanunsız olaraq tanıy ve oña mahkemede itiraz etecek ola, dep bildire Qırımnıñ öz başına tayin etilgen akimiyetine yaqın olğan «Krıminform» saytı.
Kangiyevniñ sözlerine köre, işbu qarar qanunlarğa qarşı alındı.
«Al-azırda şeer başı muavini öz işini becermege devam ete, – dedi Kangiyev. – Akim Çolahayevniñ istifası boyunca qarar mahkemede baqılacaq».
Neşir Qırım «prokuraturası»na esaslana. Mında belediye topraq ve mülkniñ qanunsız qullanuvını qayd eteler.
«Bunıñ ile şeer şurasınıñ hadimleri bunı körmemezlikke urıp, iç bir qarar almay ediler», – deyler mında.
Qarasuvbazar şeer başınıñ muavini Akim Çolahayevniñ istifası aqqında bazarertesi künü Qarasuvbazar şeer şurası deputatı Mihail Rozum bildirdi.