Türkiy memleket jurnalistlerniñ Halqara Birligi «Qırım haberleri» haber agentliginiñ idarecisi, Türkiy memleket jurnalistlerniñ Halqara Birliginiñ azası, qırımtatar milliy Meclis reisiniñ keñeşçisi İsmet Yükselge Qırımğa 5 yıllıq müddetke kiriş yasaqlığı ile bağlı öz hoşnutsızlığını bildirdiler, dep haber ete QHA.
«Bugün qırım jurnalistleri havflı alda bulunalar, akimiyet olarnıñ işine keder ete. Bunıñ ile Qırımda jurnalistlerni tek sözler ile degil de, küç vastası ile qorquzalar. Qırım jurnalistlerniñ çoqusı qorqu içinde yaşamaqtalar», – deyler Jurnalistlerniñ Halqara Birliginde.
«Birlik vekilleri bütün cemaatçılıqnı, em de «Mühbirler sıñırsız» ve «Jurnalistlerniñ qoruv komiteti» (New York) teşkilâtlarını qırım zenaatdaşları ile bağlı vaziyetke selenmege çağırdılar.
«Jurnalist işininiñ halqara qaidelerine baqmadan, Rusiye ükümeti jurnalistlerge basım köstermege devam ete. Türkiy memleket jurnalistlerniñ Halqara Birligi Rusiye akimiyetiniñ İsmet Yükselge nisbeten etken areketlerini takbih ete», – denile beyanatta.
Türkiye vatandaşı, «Qırım haberleri» haber agentliginiñ tesisçisi, Türkiyede qırımtatarlarnıñ medeniyet ve qarşılıqlı yardım Cemiyetiniñ azası İsmet Yükselge Qırımğa kirişini avgust 9 künü yasaq ettiler. Şu künü o, ailesi ile beraber tatillerden qayta edi. İsmet Yüksel Türkiye ükümetine muracaat etecek ola.