İşğal etilgen Qırımda avgust 7 kününe tek 10 yerli matbuat vastası rusiyeli qaydnı elde etti.
Bunı Qırım ve Aqyarda Roskomnadzor idaresiniñ başı Sergey Hudoley bildirdi ve qırım matbuat vastalarınıñ qayd etüv ketişatı devam etkenini qoşıp ayttı, – dep haber ete Qırımnıñ öz başına tayin etilgen akimiyetiniñ «ruporı» «Krıminform» saytı.
Sergey Hudoley hatırlattı, 2015 senesi yanvar 1-den işbu struktura «Rusiye qanunlarına köre, kendi nezaret işine başlaycaq».
«Roskmonadzor bağ operatorlarnıñ, matbuat vastalarnıñ malümat bazasını teşkil ete. Aynı zamanda matbuat vastalarnıñ qayd etilüvi boyunca iş alıp barıla. Al-azırda 10 kütleviy matbuat vastası qayd etilgen», – dedi Hudoley.
O şunı da qayd etti ki, idarege Moskvadaki Roskomnadzor merkeziy apparatınıñ temsilcisi yardım ete eken. Hadimler matbuat vastalarnıñ yolbaşçıları ile mesleatlarnı keçire, qayd etüv içün zaruriy vesiqalarnı azırlamağa yardım ete.
Hudoley Qırım ve Aqyar matbuat vastalarnıñ yolbaşçılarını işbu ketişatnı uzatmayıp, 2015 senesi yanvar 1-ne qadar yekünlemege çağıra.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, Ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.