Aqmescit – Mahkeme pristavları Federal hızmeti tarafından Çernomorskaya teleradiokompanisınıñ mülki apis etilgeni içün Qırımda belli «Центр журналисцких расследований» (Mühbirler taqiqatı merkezi) internet qaynağı zarar kördi. «İnformatsion matbuat-merkezi»niñ media-leyhasınıñ mürririyeti – «Çernomorka»nıñ binasında resmiy olaraq odanı kiralağan edi. Şimdiki vaqıtta, hadimler bilgisayar, telekamera ve diger paalı altelerden marum qaldılar. TSJR qaynağınıñ baş muarriri Valentina Samar Qırım.Aqiqatqa intervyü berip, teşkilât qanun boyunca tehnikanıñ qaytarıluvını talap etecegi, internet qaynağı ise, işini devam ettiricegini bildirdi.
– «Çernomorka» hadimlerini kibi, sizni de telekompaniya azbarına krsetmediler. Siz buña nasıl qıymet kesesiñiz?
– Tamam şu künü er şey añlaşılğan edi (avgust 1 künü mülkni apis etip, alıp çıqardılar. – Müel. qaydları) – «Çernomorka» reberleri bu binanı saqlap qalmaq mesülietini öz boynuna alğan soñ, binağa iç bir hadimni yibermediler. Aynı zamanda, mında bir avtobus «imayeciler» keldi. Er şey qanunsız olacağı birden añlaşıldı.
Politsiyanıñ ne kompaniya hadimleri, ne meni ve ne de adliye mesleatçısını yibermemege aqqı yoq edi, çünki men kiracı olam, ve menim aqqım asılında sınırlanmamalı. Mahkeme qararında «Центр журналисцких расследований» ya da İnformatsion matbuat-merkezi aqqında bir söz bile aytılmay, faqat bütün tehnikanı alıp çıqtılar ve cedvelge aldılar. Biz apparaturanıñ saipligini tasdiqlay bilecegimizni ayttıq. Kira aqqında añlaşmanı da körmemezlikke urdılar.
Bunıñ episi qanun bozuluvıdır ve mahkeme pristavı vekilleri imkânlarını qarardan ziyade qullandılar. Olar, kimniñ mülküni apis etkenlerini ögrenmek kerek ediler. Bunıñ aqqında atta mahkeme qararında aytıla. Olar, mülkni apis etken vaqıtta bile, onıñ kimge ait olğanını belgilep olalar.
Çernomorskaya TRK-na mahkeme vekilleri ziyaretiniñ aqibetleri
– Teşkilâtqa ait nasıl tehnikanı alıp kettiler?
– Üç videokamera, bilgisayarlar, noutbuklar, mikrofonlar, 5 petliçka, printerler, montaj yapqan aletler ve diger donatmalar da bar edi.
– Bu vaqialar mühbirlik işiñiznen bağlımı?
– Elbette! Olar (Mahkeme pristavı Federal hızmeti vekilleri. – Müel. qaydları) biz bu binada olğanımıznı bile ediler. Biz tehnika vesiqalarnı ketirip, olarnı bekledik. Amma, bu şahıslar bile-bile qanunnı bozdılar, bütün mülkni apis ettiler. Olar bunı tek yuqarıdan emir berilgeninden soñ, yapıp oldılar. Eñ meraqlısı, hadimlerden biri, olarnıñ arasında FHH (FSB) hadimleri de bar olğanını aytıp keçti.
– Donatmalarnı nasıl etip qaytaracaqsıñız?
– Şimdiki vaqıtta biz vesiqalarnı azırlaymız, pristav hadimleriniñ areketlerine şikâyet etecekmiz. Mahkeme, prokuratura ve uquq-qorçalayıcı teşkilâtlarğa muracaaat eteсekmiz. Men ümüt etem ki, insan aqları boyunca Qırım missiyasınıñ adliyecileri «Çernomorka» ve «Tsentr» mühbirleriniñ aqlarını qorçalamağa yardım eterler.
– Siz kendi imkânlarıñıznı qulanıp, Sergey Aksönov (Qırım baş naziri) ve Vladimir Konstantinov (Devlet şurasınıñ «spikeri»)ne muracaat etip baqmadıñızmı?
– Daa bir kere qayd etmege isteyim: biz tek qanun boyunca areket etecekmiz. Aksönov efendiniñ mahkeme qararlarını lâğu etmege aqqı yoq, ne telefon, ne de başqa vastalarnen politsiyağa emir berip olamay. Elbette, özüniñ şahsiy ordusı olğan «Qırım imаecileri»ne avаleler bere bile.
– Tehnikanı alğan soñ, saytnı bozıp taşlamağa istegenleri doğrumı?
– Bu kerçek. Ekinci künü, biz saytımıznı tamir ettik. Episini aytıp oturmayım. Saytnıñ içine kirgenler. Amma, bu meseleni al ettik. Ümüt etemiz ki, meslekdeşlerimiznen beraber saytımıznıñ ve işimizniñ telükesizligini temin etip olurmız. Men bellesem, bu kibi şeylerniñ devamı olacaq.
– «Центр журналисцких расследований» bu kibi şaraitlerde işini devam etip olacaqmı?
– Ebet, işimizni devam ettirecekmiz. Biz añlaymız, böyle şaraitlerde er kün yañı qararlarnı qabul etmek kerek. Biz, akimiyetni temsil etkenlerge baqqanda, diger– qanuniy şekillerni qıdıracaqmız. Biz tek qanun boyunca areket etecekmiz, çünki bizim vazifemiz – adamlarnı Qırımda yüz bergen vaqialarnen tanış etmekten ibaret. Amma, bizge malümatnı elde etmege daa qıyın oldı, ve şu olğan imkânlarımız daa ziyade sıñırlandı. Ve er şey mahsus yapılğanını bilemiz. Faqat, Qırımda işimizni toqtatmağa mecbur etalmazlar. Lâkin, bugünde bugün hadimlerniñ bir qısımı Kiyevge köçkenini ayta bilem. Böyleliknen, muarririyetimiz bölünecek, amma, men işanam, neşirimizni ve işimizni saqlap qalırmız.
– Siz de ketecek olasıñızmı?
– Men daa qarar almadım. İşimiz, aqlarımıznı qorçalamağa mümkün olğanı qadar ve ömürim telüke astında qalmasa, mında qalacam.