Bağçasarayda Regional Meclisni işbu binanı qırımtatarlarnıñ temsiliy organına bergen kiracınıñ aqları bozuluvı sebebinden binasız qaldıra ekenler.
Bu aqta Bağçasaray şeer yolbaşçılığı saytında aytılar.
Söz «Ocalar şurası» cemaat teşkilâtı aqqında kete. O, Puşkin,1 adresi boyunca ZAGS binasını kirağa ala. Mında Meclis de yerleşe.
Cemaat teşkilâtı kira añlaşmanıñ şartlarını boza eken.
«Añlaşmanıñ qaidelerinden birisinde böyle aytıla – eger de kira parası 3 ay devamında berilmese – añlaşma avtomatik sürette lâğu etilgen kibi sayılacaq. Şimdi kira tölenilmesiniñ müddeti bozuldı. 3 ay yerinde, kira parası yarım yıl tölenilmedi.Eki kere. Yani ödev yarım yılda bir kere ola edi», – denile beyanatta.
Mında binanıñ tarihiy ve mimariy qıymeti olğanını da bidireler. Şunıñ içün binanıñ sigortası da mıtlaqa olmalı.
«Böyle etip, kira añlaşmanıñ imzalanuvından bir ay keçkeni ile kiracı mülkniñ sigortasını etmeli. Binanıñ qullanuv müddeti devamında (2 yıl) kiracı bunı etmedi», – deyler şeer yolbaşçılığında.
Bunıñ ile şeer yolbaşçılığı Qırım «prokuraturası»na qırımtatar milliy Meclis reis muavini Ahtem Çiygoznıñ «qırımtatarlarğa akimiyet tarafından etilgen basım» aqqında bildirüvi sebebinden muracaat etecek ola.
«Şeer başı mütenasip qararnı azırlap, Qırım Cumhuriyeti Prokurorı ve Qırım Cumhuriyeti ve Aqyar şeeri boyunca Rusiye UFSB-ne yollamağa avale etti», – denile beyanatta.
Qırımtatar milliy Meclis reis muavini Ahtem Çiygoz Bağçasaray şeer başı işbu mesele boyunca mahkemege muracaat etkeni aqqında iyül 22 künü bildirdi.