Bağçasaray – Bağçasaraynıñ turistik qısımında şaşqan yerli sakin ve şeerniñ siyrek musafirleri közü ögünde silâlanğan adamlar terroristler degil de, qavehane ve restoranlar faaliyetinde bozuvlarnı qıdırdılar. Yerli iş adamlarnıñ qayd etkenine köre, teşekerüvlerni tek qırımtatarlarğa ait qavehanelerde ötkerdiler. Meclis basqı ve qırımtatarlarnı kene de qorquzacaq olğanlarını bildirdi.
Bağçasaraynıñ turistik qavehanelerni qoruyıcılar teşkerdiler. İşhane sipleri, silâlı şahıslardan qorqıp, izaatlarında vaqianı «maski-şou» dep adlandırdılar.
«Musafir» qırımtatar milliy yemekleri qavehanesiniñ idarecisi Safiye Ablayeva şunı qayd etti: «Ukrainada da ciddiy teşkerüvler ötkerile edi. Bir eki adam kelip, laqırdı ete edik. Amma, avtomatlarnen iç bir vaqıt kelmegen ediler».
Aytqanına köre, beklenilmegen «musafirler» arasında «prokuratura», «Qırım Cumhuriyeti içki işler nazirligi», «Fevqulade vaziyetler nazirligi» vekilleri bar edi. Olarnen birlikte arbiy urbada avtomatları qollarında 6 silâlanğan şahıs keldi.
«Teşkerüvni ötkergenlerden biri maña Ukraina İçki işler Nazirligi Qırımdaki bölüginiñ cinaiy taqiqatlar polkovnigi olğanını tasdiqlağan ukrain vesiqasını kösterdi»,– dep qayd etti Ablayeva.
Teşkerüvni keçirgenler Bağçasarayda qanunsız iş alıp barılğanı aqqında vesiqanı kösterip, bu tedbir şikâyet esasında yapılğanını bildirdiler.
Bağçasarayda çalışqan diger qırımtatar qavehaneleri, hususan «Salaçıq», «Aşlama-saray», «Efsane», «Meyhane», ve küçük musafirhane «Dilâra-hanum»da da vesiqalarnı baqıp, teşkerdiler.
Milliy mensürlikke köre basqı
Mecliste qayd etkenleri kibi, bu kibi tedbirler yalıñız qırımtatarlarğa ait qavehanelerde ötkerilgenini qayd etip, olarnı «tarik» ve milliy mensüplikke köre qorquzuvlar olaraq adlandırdılar.
Ahtem Çiygoz, Meclis reisi muavini
Meclis reisi muavini Ahtem Çiygoz Qırım.Aqiqatqa bildirgeni kibi, teşkerüvlerni, musulmanlar içün muqaddes Ramazan ayı keçirgenleri qırımtatarlarnı çorlandıra. «Adamlar, teşkerüv degil, basqı yapmaq içün atılıp kireler. Amma, vesiqaları yerinde olmağan diger müessiseler ep çalışalar, olarnı tiymeyler. Onıñ içün bunı tarik kibi adlandıra bilem», - dedi Çiygoz.
Aytqanına köre, teşkerüvler yerine Bağçasaray şeer şurasınıñ qırımtatar deputatları da keldi, amma, iç bir sualge cevap alamadılar.
Adını gizlemege rica etken qırımlı adliyecilerden biri bildirgeni kibi, istegen alda er müessiseniñ vesiqalarında bozuvlarnı tapmaq mümkün. «Misal içün, Bağçasaraynıñ ale daa şeer sıñırı belgilenmedi, demek topraq ayırıluvı meseleleri çezilmey qala. Bu meselelerniñ episi Ukrainada al etilmedi. Endi adamlar vaziyetniñ qapqanına tüşe bileler», - dep qayd etti Qırım.Aqiqatnıñ subetdeşi.
Bağçasaray meri yerli meclisni binasız qaldırmağa istey
Aynı zamanda, Qırım Hocalıq mahkemesi Bağçasaray yerli meclissi yerleşken binada kiralıq añlaşmalarnıñ bozuluvı aqqında şikâyet keldi. Şikâyetni şeer şurasınıñ kommunal şirketi berdi.
Bağçasaray meri Konstantin Rubanenko Qırm.Aqiqatqa izaat bererek, bu mesele tek adliyeviy saasına ait, dep ayttı, çünki binanı kiralağan «Ocalar şurаsı» cemaat teşkilâtı kira içün para bborclu. «Meclis aqqında asılında laf ketmey, bu qayd etilmegen bir teşkilât, yani resmiy olaraq o mevcut degil», - qayd etti o.
Ahtem Çiygoznıñ fikirince, Meclisniñ resmiy olaraq qayd etilmegeni, evelden Bağçasaray merine bu qurum ile iş tutmaq ve atta qol tutqanını bildirmek ve añlaşmağa keder etmey edi.
«Mesele şunda ki, Konstantin Rubanenko «Devlet şurasına» namzetligini kösterdi ve şimdi de «boyasını» deñiştirip, belli bir imtiyazlar qazanmağa istey», – dedi Çiygoz.
Bildirgenine köre, bina içün borclu qalğan paranıñ miqdarı 105 grivna etrafında, ve añlaşmanı bozmaq içün esas sebep degil.