Qırımtatar milliy Meclisi Ukrainada Donetsk vilâyetiniñ Torez şeeri civarında urıp tüşürilgen uçaqta olğan yolcu ve eyyet azalarınıñ tuvğanlarına taziyelerni bildirdi.
Meclisniñ resmiy saytındaki beyanatında: «Qırımtatar milliy Meclisi terroristik ücüminiñ qurbanı olğan «Malaysia Airlines» ava şirketi uçağınıñ yolcu ve eyyet azalarınıñ tuvğanlarına taziyelerini bildire», – denile.
«295 insannıñ ölümine ketirgen facia kene de terrorizm, devlet, topraq bütünligine, millionlarce insan ve halqlarnıñ ömür ve havfsızlığına zarar ketirgenini tasdiqladı», – denile taziyede.
Qırımtatar milliy Meclisi halqara toplulıqnı tahminen 300 insan ile uçaqnı tüşürgen terroristlerni mesülietke çekmege ve «işbu cinayetke yol bergen taraflarğa nisbeten halqara uquqnıñ eñ ciddiy qararlarnı kirsetmege» çağırdı.
Amsterdamdan Kuala-Lumpurğa uçqan Malaziya şirketiniñ Boeing 777 uçağı iyül 17 künü Ukraina şarqındaki Donetsk vilâyetiniñ Torez şeeriniñ civarında urıp tüşürildi. 295 yolcu arasında çoq bala bar edi. Er kes elâk oldı.
Ukraina havfsızlıq hızmeti separatistlerniñ laflarını aşkâr etti. Olar tüşürilgen uçaq aqqında Moskvadaki kuratorına haber ete ediler.
Yolcularnıñ yarısı – 154 insan – Niderlandı vatandaşı ola. Bunıñ ile uçaqta 27 Avstraliya, 23 Malaziya, 11 İndoneziya ve Büyük Britaniya, Almaniya, Belçika, Fillippinı, Kanada vatandaşı bar edi.