Aqmescit – İşğal etilgen Qırımda Yalta memuriy binası üzerinde Ukraina devlet bayrağı tiklenildi. Bu adden tış vaqia kün evelden yüz berdi. Bayraqnı yerli sakinlerden biri, özü rus olğan erkek köterdi. Faqat, bayraq çoq asılı turmadı: onı tezden alıp taşladılar, erkekni ise, yaqaladılar.
Yalta sakini, yahta kapitanı, 54 yaşında Sergey şu künü Antiterroristik operatsiyası devamında AN-26 uçaqnıñ urıp, yoq etilgeni aqqında eşitti. Rusiye Federatsiyası tarafından Qırımnıñ işğalini qabul etalmağan ve Ukraina şarqındaki vaqialarnı terenden qasevet etken erkek, bu haberni eşitip, eyecanlandı.
Bu kibi, fikirlerden vazgeçmek içün ara-sıra Kiyevge soylarını ziyaret etmek içün bara edi. Endi yolğa çıqmağa azırlana edi. Amma, soñki haberler onı belli bir numayışqa teşviq etti.
«... O, özcesine bir fleşmob uydurdı: gece bina üstüne tırmaşıp, bayraqlarnı deñiştirip, çoñ, trenge minip, qaçmağa istedi», - dep añlata erkekniñ soyı.
Gece Sergey, yanğın vaqtında qullanğan merdiven yardımınen 9 metr yuqarığa köterildi ve Yaltan memuriy binasındaki üç renkli bayraqnı ukrain sarı-mavılı bayrağına deñiştirdi. Soñra, sesler eşitildi, erkek aşağa sıçradı ve ayağını zararladı. Oın şeer prokuraturasına soravğa alıp kettiler, amma, neticedeesini coyıp başlağanda hastahanege yolladılar.
Yaltada ukrain bayrağı tahminen 30 daqiqa asılı turdı. Ekinci künü qanunnı bozğan erkekniñ evinde tintüv ötkerildi.
Qırım.Aqiqatnıñ subetdeşi aytqanı kibi, «prokuratura hdimleri kelip, evde tintüvni ötkerdiler, «Pravıy sector» ile bağnıñ dellilerini qıdırdılar. Vesiqalarda, öyle de yazdılar «Pravıy sector» ile alâqası tasdiqlanmadı. Evde ukrain bayrağı olsa edi, bu alâqa isbat etilir edi, amma Yaroşnıñ varaqası bile yoq».
«Bu işlerniñ episi siyasiy mananı taşıy», – adliyeci
Prokuratura bu vatandaşnı Rusiye Cinaiy kodeksiniñ 329-ci maddesi – «Rusiye Federatsiyası bayrağınıñ aşalavı» boyunca mesülietlikke çekmege istey. Bu maddege köre, erkekni bir yılğa qadar apis ete bileler.
Adliye qabulhane ağlarınıñ adliyecisi Yelena Lunevanıñ sözlerine köre, asılında aşalav, devlet timsaline nisbeten bir de bir areketni talap ete. Amma, bir bayraqnıñ digerine almaşuvını içtimaiy cietinden havflı areketlernen bir sırağa qoyulmaz. Bu vaqianı, öz başına areket etüv kibi tanımaq ve memuriy maddelerge köre baqılması kerektir. Amma, adliyeciniñ fikirince, bu işniñ devamı ne olacağını tahmin etmek küçtir.
«Şimdiki vaqıtta, bu işler siyasiy mananı taşıy, olarnıñ episi cinaiy mahkeme ya da asılında mahkemede baqılmamaq kerek. Sentsov ya da Kölçenkonıñ işleri cinaiy i şve kerçek cinayetlernen bağlı degiller. Ve şimdilik, «Pravıy sector» ile bağnı tasdiqlamağan olsalar, taqiqat işleri devamında isbatlay bileler», – qayd etti adliyeci.
Diger közeticilerniñ fikirince, bu vaqia aqqında haberniñ tarqatıluvı yarımada «akimiyeti» içün elverişli degil, çünki Qırımnıñ «Rusiye ile birleşüvine» er kes quvanmağanını ve yerli «akimiyet», Kremlge esabat bergeni kibi, er şeyni nezaret etip olamay.