Keçken seneden başlap Amerika Qoşma Ştatlarında, cümleden New -Yorkta, «Razom» (Beraber) cemaat teşkilâtı faalleriniñ desteginen el işlemeleriniñ mezatları keçirilmekte. Hand-made mahsulatlarınıñ satılışından qazanılğan parağa Maydanda elâk olğan insanlarnıñ ailelerine, Qırımdan qaçqan insanlarğa ilâc, urba, hocalıq eşyaları kibi zarur şeyler satın alına. Mezatta Amerika, Ukraina ve diger memleketlerde yaşağan em professional ustalar, em aveskârlar iştirak eteler. Leyhanıñ Qırım boyunca idarecisi Lerane Kozakeviç.
«Maydandaki vaqialar, demokratiya içün küreşken Ukrainağa yardım bermek içün qurulğan «Razom» (Beraber) cemaat teşkilâtınıñ azalarınen men baarde, öldürilgen Reşat Ametovnıñ ailesinde felâket qopqanda tanış oldım. Teşkilâtnıñ azaları Zarina Ametova ve onıñ üç balasına bayağı yardım ettiler. Bunıñ kibi de faaller Maydanda elâk olğanlarnıñ qorantalarına, qaçaqlarğa, em de er angi, milleti ve diniy mensüpliginden qatiy nazar, yardımğa muhtac insanğa qoltutalar», - dep ikâye ete Lerane Kozakeviç.
Lerane Kozakeviç
Mezat teşkilâtçıları bilhassa milliy mevzuda yasalğan şeylerni isteknen qabul eteler. Çünki etnik eşyalar şimdi pek mot, almağa istekliler çoq ve bu şeyler pek tez satıla. Toplanğan parağa ise zarur şeyler satın alına ve saibine yetkizile.
Teşkilâtnıñ reisi Lüba Şipoviç Qırım Aqiqatnıñ mühbirine añlatqanına köre, para keçirmek küç. İmkânı tapılsa bile belli miqdarda aqçağa belli bir cöreme qoyula. Şu cöremege ise daa bayağı zarur şeylerni almaq mümkün.
Soñra içtimaiy ağlarda bu eşyalarnı bedava alıp ketmege azır insan araştırıla. Böyle bir özgün logistika sistemi qurula.
el beceresi
Bütün Ukraina boylap em suvenirler yasaycaq ustalar, em bu şeylerni özlerinen Amerikağa alıp ketecek hayırsever insanlar az degil. Yaqın arada Amerikağa ketecek insan, misal içün, Lvovda seslense, demek şeyler uçaq, araba ya da trennen Lvovğa yetkizile ve böyle de yolnen keri qaytalar. Qırımda bu areketlerni idare etken Lerane Kozakeviç hayırsever insanlarğa böyle muracaat ete: «Sevgi ile barıp, büyük ümüt ile qaytması kerek».
Leyha iştirakçilerinden biri, emizikli balasınen tatilde bulunğan Yuliya Dobrınina bu aqta böyle dey: «Men boş vaqıt tapqanımda basmadan oyuncaqlar ve süs eşyalarını tikem. Bir tükânçığım bar, onı yürütmege tırışam, hayriye tedbirlerinde iştirak etem. Bu mezatlar aqqında dostum, menim kibi evde bala baqqan çeber usta Olga Korablövadan eşittim. Olga da oyuncaqlar tikip sata, parasını ise ordu itiyaclarına ve yaralılarnıñ tedavisine keçire. Tünevin men küçücik bir ayuvçıqnı tikip yetiştirdim, onı da mezatqa yollamağa isteyim
vatanperverlik mevzusında el beceresi
Asılında er şey mayıs 18 arfesinde başlandı. AQŞnıñ ukrain ve qırımtatar diasporasına BMT binasında balalarnıñ vatanperverlik mevzusında sızğan resimleriniñ sergisini teşkil etmek teklif olundı. Sergi pek yüksek seviyede keçti. Genç ressamlarğa bahşışlar yiberildi. Sergi iştirakçilerine taqdim etilecek diplomlar şimdi Ukrainanıñ Birleşken Mlletler Teşkilâtındaki daimiy temsilcisi cenap Yuriy Sergeyevge imzalamaq içün berildi. Diplomlar kelgen soñ er bir balağa berilecek.
Şimdilik mezatlar tek New-Yorkta ötkerile, amma soñki vaqıtta böyle mezatlarnı Ukrainada da keçirmek teklifleri tüşmekte. Qırımlılar ise bu hayriye tedbirlerinde iştiraklerini devam etmek meramındalar.