Sovet ükümeti devirinden başlap, qırımtatar milliy areketi silâsız küreş alıp bara. Çeşit sayıda miting, ariza, muracaat, narazılıq tedbirleri çoq yıllar devamında qırımtatarlarnıñ noqtai nazarını bildirmek içün teşkil etildiler. Yarımadanıñ yañı akimiyeti Rusiyeniñ qanunlarını işletip, qırımtatarlarnıñ aktsiyalarına qarşı küreşeler. Bu sebepten, Qırım akimiyeti icadiy fleşmoblarnen qarşılaşması mümkün – bu soy tedbirlerni qırımtatarlar üküm etken qanunları çerçivesinde keçirecekler.
Aqmescit şeer şurası qırımtatarlarğa iyün 26-nda qırımtatar Bayraq kününe bağışlanğan tedbirlerni şeerniñ merkezinde keçirmege yasaq etti. Başından, Trenöv bağçası aqqında söz yürütile edi, akimiyet anda raatlanğan «yüzlernen balalar içün havflı» olacaq tedbirni keçirmege red etti.
Akimiyet vekilleri, tamam balalar içün ötkerilgen resim, yemek yarışları, milliy-ameliy sanaat sergisi ya da çölmekçilerniñ iş nümüneleri, kontsert nasıl etip te telükeli olacağını añlatmadılar.
Kene de, eyi niyetli akimiyet Bayraq kününine bağışlanıp, avtomobil yürüşini de yasaqladı. Merkeziy soqaqlarda ötkerilecek avtomobil yürüşi «taşıyıcı, yolcularğa qolaysızlıqlar ketirip, olarnıñ aqlarını boza bile», - dep qayd ettiler şeer şurasında.
Şeer memuriyeti bayram tedbirlerni keçenleri tatarlarnıñ Sabantuyı ötkerilgen Salğır bağçasında keçirmege teklif etti.
Amma, teşkilâtçılarnı bu teklif qandırmadı, bu sebepten, olar özüniñ nevbetinde Aqmescitniñ Lenini meydanında bayramlaşmağa izin soradı. Bu sefer de resmiy «yoq» cevabı keldi, bildirgenlerine köre, tamam iyün 26 künü saat 9.00-dan 21.00 –ge qadar «Rus cemiyeti», «Mordoviya Qırımğa» yardım olaraq yibergen naqliye vastalarını («KAMAZ» maşinaları) qarşılap, özüniñ marafon-tedbirini ötkerecek.
Meclis, Qırım akimiyeti qırımtatarlarnı aşalay dep, onı qabaatlay
Merkeziy meydan yerine şeer şurası qırımtatar milliy Bayraq kününi …qırımtatarlar toplu yaşağan Ak-meçet qasabasında yerli cami yanında ötkermege teklif etti.
Meclis reisi Refat Çubarov akimiyetniñ bu kibi areketlerni qırımtatarlarnıñ «aşalavı boyunca siyaseti» dep adlandırdı.
«Şeerniñ merkezinde bayramnı qayd etmek yasağı –, qırımtatarlarnı ayırmaq, qırımtatar balalarınıñ çetleşüvi demek. Bir şeyni keçirmege isteysiñizmi, Aqmescitniñ çetine buyurıñız», - dep, çorlandı Refat Çubarov.
Meclis reisiniñ sözlerine köre, bu qararnı Aqmescit meri şahsen Viktor Ageyev qabul etkeninde şübelene. «Menimce, onıñ ögüne belli şartlar qoyuldı. Bazılarına Aqmescitniñ merkezinde tedbirlerni keçirmege mümkün, bazılarına yoq demeleri iç te olmaz», - dedi Meclis yolbaşçısı.
Matbuat-konferentsiyası devamında o mühbirlerge aytqanı kibi, iyün 23 künü saba Aqmescitniñ şeer şurasına daa bir mektüp yollanılıp, Bayraq kününiñ keçirilüvi içün - «Kosmos» kinoteatri ögündeki meydannı ayırmağa rica etildi.
Yasaqqa qarşı fleşmob teşkil eteyikmi?
Akimiyetniñ yasaqları içtimaiy ağlarda faal muzakere etile. İcadiy yaşlar qarar aldı: resmiy olaraq ve birlikte bayramlaşmağa yasaq etilse, kendi başına er kes Bayraq kününi keçirsiñ!
Meclis azası ve teşkilâtçılardan biri Dilâver Akiyev Facebook saifesinde böyle teklifnen çıqtı: «Bu künü er kes raatlıq kününi ilân etsin, balalarnı dondurma aşamağa bağçalarğa alıp ketsin, milliy timsallerni qullansın: tamğalarnen yaraştırılğan bayraq, futbolka, ilvanlar olsun».
Qırımtatar kitapları satılğan merkezde tasdiqlaylar: soñki künleri milliy timsallernen bezetilgen mahsulatnı da çoq alıp başladılar. Müşterilerniñ talalarına tükân birden seslendi: mında, çeşit ölçüde milliy bayraqlarnı, futbolka, şerit, küpelerni satın almaq mümkün.
Aqmescitniñ merkezinde iyün 26 künü avtomobil yürüşi yasaq etilgenine baqmadan, bir sürü maşina milliy bayraqlarnen yaraştırılacaq. Yaşlar külümsirep: «Amma, qoruyıcılarnıñ qasevet etmesinler, er şey qanun boyunca yapılacaq», - deyler.
Qırımtatar Bayraq Kününe qadın-qzlar teşkilâtları da azırlıq köreler. Evelden cenkke qarşı çıqıp, birleşken qadınlar qırımtatar milliy bayrağı astında çıqmağa niyetleneler.
Bayraq Kününiñ keçirilüvi milletlerara munasebetlerni pekitecegini Refat Çubarov da qayd etti.
«Üküm etken qanunlar çerçivesinde, biz bir sıra tedbirlerni azırlaymız ve olar evelden belgilengen merasimden daa keñiş ötkerilecekler. Belki de akimiyet taaciplenir, amma er şey qanun boyunca olacaq», – dedi Meclis reisi.
Mecliste bildirgenilerine köre, Bayraq kününe bağışlanğan tedbirler tek Aqmescitte degil de, yarımadadanıñ diger şeer ve qasabalarında teşkil etilecekler.
Your browser doesn’t support HTML5
Власти полуострова нарушают права крымских татар – Рефат Чубаров